Тĕлĕнтермеллипе тĕлĕнтернĕ

Çĕнĕ Шупашкарти «Кванториум» ача-пăча технопаркĕнче проектсен ярмăркки иртрĕ. Унта çӳрекен çамрăксем хăйсен ĕçĕсемпе паллаштарчĕç. Республикăри тĕрлĕ предприяти ертӳçисем хăш-пĕр пуçарăва малалла аталантарма пулăшма шантарчĕç.

30 ытла проект хатĕрленĕ «Кванторима» пухăннă яш-кĕрĕм. Ольга Архиповăпа Кирилл Дмитриев тĕслĕхрен ӳсен-тăрана кĕретсĕр шăвармалли тытăма хута ярасшăн. Çĕр айне пытарнă датчик сывлăш, çĕр типнине плата тăрăх хыпарлать. Унтан насус тăрăх шыв анать. Датчик çĕр çителĕклĕ йĕпеннине пĕлтерсен шыв юхма чарăнать. Тепĕр кăсăклă проектпа Кирилл Самойлов паллаштарчĕ. Вăл кунта хăйĕн юлташне – Ярика илсе килнĕ. Робот мероприятие ертсе пыма, тĕрлĕ ыйтупа канаш пама пултарать. Хальлĕхе вăл хуравлаймасть-ха, сасă хатĕрĕ çук. Аллипе куçать, куçне хупса уçать, çăварне карать. Аккумулятортан вăй пухать вăл. Кирила çак проекта хатĕрлеме çулталăк кирлĕ пулнă. Тепĕр хут çавнашкал робот тума вара 2-3 уйăх çителĕклĕ тет каччă.

ЕЛЕНА КУПРИЯНОВА: «Çак ярмăрккăра 30 проект вĕрентекенсем хатĕрленĕ. Вĕсене тĕрлĕ енсемпе хатĕрленĕ. Дизайн, компьютер, технологи енĕпе, инженер юсавĕсем, медицина, биологи, альтернативлă энерги енĕсемпе хатĕрленĕ ачасем. Пирĕн ачасем питĕ пултаруллă, маттур. Эпир вĕсемшĕн питĕ савăнатпăр».

Çут çанталăка упрас енĕпе те çамрăксем тăрăшаççĕ. Ĕмĕрех çĕр айĕнче выртма пултаракан пластик хатĕрсем вырăнне вĕсем вăхăт иртнĕçем хăйсене хăйсем ирĕлме пултаракан савăт-сапа, пакет кăларма пуçласшăн. Çавăнпа та çав шĕвеке крахмал, сĕт хушаççĕ.

ЕЛЕНА КУПРИЯНОВА: «Çак проектсене хаклама пирĕн пата тĕрлĕ экономика енĕпе çыхăннă çынсем, промышленность, экологи, технологи, хими енĕсемпе çыхăннă экспертсем хаклама килнĕ».

Çĕнтерӳçĕсем паллă. Пĕрремĕш вырăнта – «Кванториумра фитодизайн енĕпе хатĕрленĕ проект авторĕсем – Полина Маркова, Софья Архипова. Çавăн пекех Ярик робот-пулăшуçăпа паллаштарнă Кирилл Самойлов, Алексей Антонов, Аделина Виноградова мала тухрĕç.