Ӆуӊ кутоп хатӆэв порыӆысэв

Унт ӆор тыӆащ кимет хатаӆан Ӆуӊ кутоп хатӆэв порыӆысэв. Там ун емаӊ хатаӆан кашӊ вошан па куртан уӆты хантэт пасан омпсыӆысат, порыӆысат. Ӆуӊхӆаӆ сыйемисат.

Йис тэӆан, хуӆ веӆты ёх ки — соӆаӊ, няр па потам хуӆаӆ пасана омпсыӆысӆы. Куртаӊ мохиӆаӆ вохиӆысӆы. Турам пеӆа пойкащисат, ям уӆапса па туӊ юш вохиӆысат. Каврам хошик пусӊаӆ манам юпийн пасан сура опсыӆысат. Тащан яӊхты ёх ки — ищиты порыӆысат, вуӆы хорыӆысат.

Рутӆаӆ-сырӆаӆ пиӆан уйтантыӆат. Хор: «ӅА» архив

Хоты овращӆув-щащиӆув ястыӆысат: Ӆуӊ кутоп хатӆ юпийн пеӆӊа и шимӆа йиӆ, щишан вуӆы тащат па ант иляпӆайт. Таӆ кеша пунӆаӆ туӊа щира энамӆат, таксара па вояӊа йиӆат. Щишан таӆан уӆӆыты хот воӆӆаӆа тумтака ёхтаптыӆат. Хуӆ веӆты ёх ищи таӆ куртӆаӆ унты касаӆты порая ӆэщатыӆат: хуӆвой паӆӆат, шумах сораӆӆат, манты леп па хуӆ соӆыӆат.

Ин вошатан па ун куртатан уӆты мохет ищиты ияха актащиӆат, порыӆыӆат, пасан омпсыӆыӆат. Рутӆаӆ-сырӆаӆ па ван хоятӆаӆ еӆӆы ищиты тумтака ат усат, ант мушитсат, няврэмӆаӆ яма ат утаӆтысат, семьяйӆаӆ пиӆан еӆӆы тумтака ат усат.