Кариес аркасында пневмония барлыкка килә

Тешләрне вакытында дәваламасаң, пневмония белән авырып китәргә була. Бу турыда стоматолог Мария Дегтяревага сылтама белән «АиФ» яза.

Табиб сүзләренчә, кариесны бактерияләр китереп чыгара. Алар авызда үрчи, бөтен организмга таралырга, шул исәптән сулыш юлларына да китәргә мөмкин.

«Авыз куышлыгындагы инфекция дәваланмаса, бактерияләр сулыш юллары буйлап аска төшеп китә, үпкәләргә җитеп, җитди респиратор авырулар, хәтта пневмония китереп чыгарырга мөмкин», – ди Мария Дегтярева.

Аның сүзләренчә, дәваланмаган тешләр аркасында даими ялкынсыну процессы организмның иммунитетын киметә, димәк, кешедә хроник авырулар башланырга мөмкин.

Шулай ук гел сызлап торган теш барлыкка китергән стресс кеше сәламәтлегенә начар тәэсир итә.

Өстәвенә кариесны дәваламасаң, йөрәк-кан тамырлары системасы авырулары, бала булмау, хәтта баланы алдан тудыру да булырга мөмкин, диелә хәбәрдә.