Алабуга Башкарма комитеты хезмәткәре 5 килограммлы чуртан тоткан

Алабуга Башкарма комитеты җитәкчесенең инфраструктура үсеше буенча урынбасары Андрей Томилин Морт буасында 5 килограммлы 70 сантиметрлы чуртан тоткан. Ул бирегә балык тотарга еш килә икән. Бу хакта «Алабуга нуры» хәбәр итә.

Сүз уңаеннан, Андрей Александрович – тәҗрибәле балыкчы. Өч дистә елдан артык ул бу һөнәр белән кызыксына. Аның бабасы да, әтисе дә балыкчылыкка битараф булмаган. Ә хәзер инде Андрейның улы Марк та рәхәтләнеп балыкка йөри. Әтисе тоткан балык малайны, әлбәттә, гаҗәпләндергән.

«Мондый «трофей» тотканым юк иде әле. Гаҗәпләндем, дип әйтү генә дөрес булмас, балыкның зурлыгыннан мин шок хәлендә калдым. Тартып чыгарганчы, ай-яй тырышасы булды. Янымда булган балыкчылар да миңа ярдәм кирәк икәнен тиз генә аңламады, югалып калдылар. Андый балыкның безнең сулыкларда булуына мин үзем дә ышанмадым. Күргәнегезчә, бар икән. Фотоны социаль челтәргә урнаштыргач, миллион сорау яуды, дисәм, алдашмасмын. «Кайдан тоттың? Нәрсәгә тоттың? Кармагың нинди?» кебек сораулар бер-бер артлы яуды», – дип сөйли бәхетле балыкчы Андрей Томилин.