Պենտագոնի ղեկավարը «պատմական» է անվանել Սուրեն Պապիկյանի այցը ԱՄՆ
ԱՄՆ պաշտպանության նախարարության հայտարարության մեջ ասվում է, որ հանդիպման մեկնարկին Պենտագոնի ղեկավարը նշել է, որ այցի նպատակն է քննարկել ԱՄՆ-ի եւ Հայաստանի միջեւ ռազմավարական հարաբերությունները, որոնց մաս է կազմում երկարամյա գործընկերությունը Հայաստանի պաշտպանության նախարարության եւ Կանզասի ազգային գվարդիայի միջեւ:
«Ձեր այցը պատմական է։ Հայաստանն իր ձեռքը մեկնել է Միացյալ Նահանգներին, եւ ես հպարտ եմ ողջունել ձեզ այսօր այստեղ»,- նշել է Օսթինը։
Նա նշել է, որ ԱՄՆ-ն աջակցում է ինքնիշխան, անկախ ու բարգավաճ Հայաստանին եւ Հարավային Կովկասի տարածաշրջանում խաղաղության ու կայունության հաստատմանը։
«Մենք հարաբերությունները կառուցում ենք ամուր հիմքի վրա: Մեր զինծառայողները կողք կողքի ծառայել են Աֆղանստանում, եւ մենք շարունակում ենք միասին աշխատել Կոսովոյում ՆԱՏՕ-ի ուժերի կազմում: Սա մեր առաջին հանդիպումն է, եւ մեր օրակարգը հագեցած է։ Պատրաստ եմ ծանոթանալ հայկական զինված ուժերի ապագայի եւ Հարավային Կովկասում խաղաղության հեռանկարների վերաբերյալ ձեր տեսլականին»,- ասել է Պենտագոնի ղեկավարը։