Ձյան մաքրման աշխատանքները կշարունակվեն ողջ գիշեր. քաղաքապետարան
![Ձյան մաքրման աշխատանքները կշարունակվեն ողջ գիշեր. քաղաքապետարան](http://gdb.rferl.org/36F03888-C88A-4285-831D-D71EB2C40F46_w800_h450.jpg)
Երևանում շարունակվում են նախորդ օրվա երեկոյից մեկնարկած ձյան մաքրման աշխատանքները:
Քաղաքապետարանի տեղեկատվության և հասարակայնության հետ կապերի վարչության փոխանցմամբ, չդադարող տեղումներին զուգահեռ՝ համապատասխան մեքենամեխանիզմներով շարունակվում են գլխավոր և երկրորդական փողոցների ձնամաքրման և աղային խառնուրդով մշակման աշխատանքները: Ձյան շերտից պարբերաբար մաքրվում են նաև մայթերն ու դեպի միջբակային տարածքներ տանող ճանապարհները:
Իրականացվող աշխատանքները շարունակում են կանոնակարգել և վերահսկել վարչական շրջանների ղեկավարներն ու Երևանի քաղաքապետարանի կոմունալ տնտեսության վարչության և հատուկ օպերատիվ շտաբը: Բոլոր աշխատանքները կշարունակվեն ողջ գիշերվա ընթացքում, ասված է հաղորդագրությունում։