Дүшәмбе көнне Татарстан мәктәпләрендә дәресләр Муса Җәлил әсәрләреннән башланачак

Татарстан мәктәпләрендә 16 февральдә дәресләр Советлар Союзы Герое, шагыйрь Муса Җәлил әсәрләреннән башланачак. Республиканың мәдәният министры урынбасары Дамир Натфуллин хәбәр итте, дип яза «Татар-информ».

«Әгәр үсеп килүче буынга җиткермәсәк, геройларыбыз турында хәтерне мәңгеләштерү буенча тырышлыгыбызга нинди бәя биреп булыр? Җәлил турында хәтер дәресләренең Татарстанның тарихи мирасына хөрмәт һәм патриотизм формалаштыра торган куәтле тәрбия коралы булуына ирешергә кирәк», – диде ул.

Дамир Натфуллин 2026 елның ТР Рәисе Указы белән Хәрби батырлык һәм хезмәт фидакарьлеге елы дип игълан ителгәнен искәртте.

«Татарстан Мәдәният министрлыгы эшчәнлеге юнәлешләренең берсе – республикада танылган шәхесләр һәм вакыйгалар турында хәтерне мәңгеләштерү. Министрлык каршында мемориаль такталар һәм монументаль сәнгать буенча комиссияләр гамәлдә», – диде министр урынбасары.

Ул Муса Җәлил турында хәтерне мәңгеләштерү буенча чаралар кысаларында Муса Җәлил исемендәге республика премиясе гамәлдә булуын, Казан, Мәскәүдә һәм Россиянең күп кенә башка шәһәрләрендә һәйкәл куелганын билгеләп узды. Казанда Җәлил исемендәге урам бар. Шулай ук, илебезнең күп кенә шәһәрләрендә урам исемнәре Җәлил исеме белән аталган.

«2026 елда республиканың муниципаль районнарында Муса Җәлилнең юбилей датасына багышланган урыннар бар. (861 хәтер почмагы). Ел саен Татарстан Республикасында һәм аннан читтә Герой-шагыйрь Муса Җәлилне һәм аның көрәштәшләрен искә алу көне – 25 август, шулай ук шагыйрьнең туган көне – 15 февральдә тантаналы чаралар һәм чәчәк салу тантаналары үткәрелә. Ел саен уздырыла торган Татарстан Республикасы мәдәнияте көннәре кысаларында Мәскәү шәһәрендә дә чәчәк салу тантанасы уза», – диде Дамир Натфуллин.