Үлестік құрылыста тәуекелдер төмендейді
АСТАНА. ҚазАқпарат - Жаһандық дағдарысқа қарсы шаралар кешенінде еліміздің құрылыс саласын, соның ішінде тұрғын үй құрылысын дамытуға ерекше мән беріліп отыр. Елбасының тапсырмасына сәйкес, биылғы нақтыланған бюджетте Ұлттық қордан тұрғын үй құрылысын дамытуға да қомақты қаражат бөлініп отыр. Осының өзі дағдарысқа қарамастан көптеген қазақстандық отбасылар баспаналы болады деген сөз. Әйтсе де, тұрғын үй құрылысы саласында шешімін табатын мәселелер тек бюджеттің қаражатына тіреліп тұрған жоқ. Соның бірі тұрғын үй құрылысына үлестік қатысу мәселелері болатын. Жақында осы бағыттағы заңнаманы жетілдіріп, құқықтық олқылықтарды жоятын заңды Парламент қабылдаған болатын. Заңға кеше Елбасы Нұрсұлтан Назарбаев қол қойып, құжат күшіне енетін болды.