Օր առաջին. Ժամանում Ռիո
Օլիմպիական եռուզեռը մեզ համար տրվել էր դեռ Լիսաբոնում, որտեղից 31-րդ խաղերի մայրաքաղաք էին ժամանում տարբեր թիմերի մարզիկներ ու պատվիրակություններ:
Խաղերի բարեհամբույր ու ժպտերես կամավորները Ռիոյի օդանավակայանում ամենուր են, նրանք օգնում են բոլորին ու փոխանցում օլիմպիական տրամադրությունը:
Բոլոր նախատեսված գործընթացներն ավարտելուց հետո, երբ ճամպրուկներով պատրաստվում էինք հեռանալ, կամավորներից մեկը միանգամից բացականչեց. «Սերժ Թանգյան, SOAD»: Նա խոստովանեց, որ մեր երկիրը ճանաչում է աշխարհահռչակ երգչի ու խմբի շնորհիվ:
Արդեն մեքենայում փորձում ենք առաջին տպավորությունները ստանալ: Սակայն հենց առաջին րոպեներից այս շատ մեծ ու բազմաշերտ քաղաքի մասին կարծիք հայտնելը սխալ է:
Մեզ ուղեկցող ՀԱՕԿ-ի գլխավոր քարտուղար Հրաչյա Ռոստոմյանը նկատեց, որ այս 8 օրերի ընթացքում ինչ Ռիոյում են, հիացած են, թե ինչպես են բրազիլացիներն անխտիր զբաղվում սպորտով: Դրանում մենք էլ համոզվեցինք եւ «Մարականայի» շրջակայքում նկատեցինք վազող ու մարզվող տարեց մարդկանց:
Այսօր կայացել է նաեւ օլիմպիական ավանում Հայաստանի դրոշի բարձրացման արարողությունը: «Մեր մարզիկները մարտական են տրամադրված ու սպասում են իրենց ելույթներին»,- նշեց Ռոստոմյանը
Դեռ ընդամենը մի քանի ժամ է, ինչ Ռիոյում ենք, ու ավելի մանրամասն կառնավալների ու ֆուտբոլի հայրենիքի մասին կպատմենք առաջիկա 21 օրերի ընթացքում:
Ռիոյից՝ Գոհար Նալբանդյան, Հասմիկ Բաբայան
Նախագծի գործընկեր