Սլովակիայի վարչապետ․ Մոսկվայի նկատմամբ պատժամիջոցները չեղարկելու ժամանակն է
![Սլովակիայի վարչապետ․ Մոսկվայի նկատմամբ պատժամիջոցները չեղարկելու ժամանակն է](http://gdb.rferl.org/B340E205-1F28-407A-9A38-AD755988CA50_cx38_cy30_cw61_w800_h450.jpg)
Սլովակիայի վարչապետ Ռոբերտ Ֆիցոն Մոսկվայում Ռուսաստանի նախագահ Վլադիմիր Պուտինի հետ հանդիպումից հետո, լրագրողների հետ զրուցի ընթացքում, հայտարարել է, որ եկել է Ռուսաստանի նկատմամբ Եվրամիության սահմանած պատժամիջոցները չեղարկելու ժամանակը:
Ներկայումս Սլովակիան հերթագայության կարգով նախագահում է Եվրոպական միությունում: Հաջորդ շաբաթ Սլովակիայի մայրաքաղաք Բրատիսլավայում նախատեսված է Եվրամիության արտաքին գործոց նախարարների համաժողովի անցկացումը: Վարչապետ Ֆիցոն Կենտրոնական Եվրոպայի այն եզակի ղեկավարներից է, ովքեր ընդդիմանում են Ռուսաստանի նկատմամբ սահմանված պատժամիջոցների երկարաձգմանը:
Եվրոպական միությունը Մոսկվայի նկատմամբ պատժամիջոցներ է սահմանել, ի պատասխան 2014 թվականի մարտին Ռուսաստանի կողմից Ղրիմի գրավման: Պատժամիջոցները մի քանի անգամ երկարաձգվել են, դրանց հերթական ժամկետը լրանալու է 2017 թվականի հունվարի վերջին:
Սլովակիան Ռուսաստանից ներմուծում է գազ և նավթ, ինչպես նաև՝ միջուկային վառելիք երկու ատոմակայանի համար: Պատժամիջոցները չեղարկելու կողմնակից են նաև Հունգարիայի վարչապետ Վիկտոր Օրբանը և Չեխիայի նախագահ Միլոշ Զեմանը: