«Дабаан» хаһыат: Улуус дьонун-сэргэтин кытта бииргэ үлэлиэхпит

Быйыл Кэбээйи улууһун “Дабаан” хаһыат редакцията Ил Дархан “Трезвая Якутия: реализация мер по борьбе с пьянством и алкоголизмом в Республике Саха (Якутия)” грант ылан, бу чэрчитинэн ыытыллыахтаах үлэни саҕалаатыбыт. Бу күннэргэ “Саха сирэ” хаһыат редакциятын үлэһиттэрин кытта холбоһуктаах десаны тэрийэн, Кэбээйи улууһун үс нэһилиэгэр: Мукучуга, Мастаахха, Лүксүгүҥҥэ сырыттыбыт. Хас нэһилиэк ахсын общественноһы кытта көрсүһүүлэри тэрийдибит, оскуола оҕолоругар бэсиэдэлэри ыыттыбыт, арыгы содулун кэпсиир киинэлэри көрдөрдүбүт.

Үөрэнээччилэр чуумпуран олорон иһиттилэр, кырдьык да арыгы алдьархайтан атыны аҕалбатын өйдөөн тарҕастылар. Оттон хас нэһилиэк ахсын общественность маннык үлэ эдэр ыччакка уонна оскуола оҕотугар хайаан да ыытыллара наадалааҕын чорботон бэлиэтээтэ. 1 из 45 Лүксүгүҥҥэ Арыктаах нэһилиэгин баһылыга Владимир Ноговицын уонна биригэдьиир Михаил Иванов тэрийиилэринэн төрүт сахалыы сиэри-туому тутуһан муҥхалаатыбыт. Күөлгэ нэһилиэк дьоно оҕолуун-ыччаттыын бары тэҥҥэ киирэн үлэлээтилэр. Маннык түгэннэргэ арыгыта суох чөл олоххо дьулуһар нэһилиэк олоҕо-дьаһаҕа ырылыччы көстөр эбит.

Сылдьыбыт үс нэһилиэкпит дьонун-сэргэтин кытта чөл олох хайысхатынан бииргэ үлэлиир бигэ санаалаах араҕыстыбыт.