ЕИ лидерларининг навбатдаги йиғинида Украина ва Сурия масалалари муҳокама қилинади

Европа Иттифоқига аъзо давлатлар етакчилари 15 декабрь куни Брюсселда бир кунлик саммит учун тўпланди.

Йиғин давомида Москванинг Украинадаги ҳаракатлари туфайли Россияга қарши жорий қилинган санкциялар олти ойга узайтирилиши кутилмоқда.

Йиғилишда, шунингдек, Нидерландия бош вазири Марк Рюттенинг махсус таклифи кўриб чиқилади. Рютте апрель ойида Нидерландияда ўтказилган референдум натижаларига қарамасдан, Европа Иттифоқи ва Украина ўртасида сиёсий ва савдо алоқаларини ўрнатувчи шартномани ратификация қилишни истайди.

Келишувни Нидерландиядан бошқа барча Европа Иттифоқига аъзо давлат ратификация қилган. Нидерландия бош вазири келишув ўз мамлакатидаги сайловчилар талабларига биноан ўзгартирилишини хоҳлайди.

2013 йилда Украинанинг ўша пайтдаги президенти Виктор Янукович Москва босими остида Европа Иттифоқи билан шартномани имзолмаган, бу эса “Евромайдон” намойишларини келтириб чиқарган эди.