Ришат Төхвәтуллин гармунда уйнап залга төште һәм әнисен сәхнәгә алып менеп җырлатты
Казанда Ришат Төхвәтуллинның концертлары бара. Бүген, Әниләр көнендә, концертка җырчының әти-әнисе дә килгән иде.
Җырчы гармунда уйнап сәхнәдән төште һәм әти-әнисе янына килде. Ул әнисенә купшы чәчәк бәйләме бүләк итте һәм әнисен сәхнәгә алып менде.
Ришат Төхвәтуллинның әнисе Розалия ханым – җырчының күп җырлары авторы да. Ул залдагы әниләрне бәйрәм белән котлады һәм тамашачыга «Мәтрүшкәләр» җырын бүләк итте.
«Сабый чактан ук шушы җырны җырлап үстем, һәм мине авылда «мәтрүшкәләр» дип йөртәләр иде», – диде Розалия ханым.
Видео: Гөлүзә Василова