Дәҗҗал нәрсә ул һәм аннан ничек сакланырга?

«Хозур» нәшрият йорты «Дин вә мәгыйшәт» редакциясе телеграмда «Дин турында. Сезнең сорауларга җаваплар» каналында Дәҗҗал фетнәсеннән котылу турында аңлаттылар.

Расүлебез безгә Кыямәт көне алдыннан Дәҗҗал дип аталучы мәхлүкъның барлыкка килүен әйтеп калдырган.

Мөхәммәд салләллаһу галәйһи вә сәлләм аның турыда: «Адәм яратылганнан алып, бу дөньяның соңгы сәгатенә кадәрге вакыт аралыгында Дәҗҗалдан да куркынычрак мәхлүкъ юк», – дип әйткән.

Дәҗҗал бик оста алдаучы булыр һәм үзенең хәйләкәрлеген кешеләрне дөрес, туры юлдан чыгарып, үзе артыннан ияртер өчен файдаланыр (хәтта кайбер Коръән укый торган, гамәл кыла торган мөселманнар да аңа ышаначак).

Пәйгамбәребез мөселманнарны, Дәҗҗалга иярмәгез, дип кисәтте.

Бу хәйләкәр хәтәр мәхлүкътан котылу өчен, түбәндәге доганы укырга кирәк:⠀

اللَّهُمَّ إِنِّى أَعُوذُ بِكِ مِنْ عَذَابِ جَهَنَّمَ وَ مِنْ عَذَابِ الْقَبْرِ وَأَعُوذُ بِكَ مِنْ فِتْنَةِ الْمَسِیحِ الدَّجَّالِ وَأَعُوذُ بِكَ مِنْ فِتنَةِ الْمَحْیَا وَ الْمَمَاتِ.

«Аллааһүммә иннии әгууз‌ү бикә мин газ‌әәби җәһәннәмә вә мин газ‌әәбиль-кабри вә әгууз‌ү бикә миң фитнәтиль-мәсиихиддәҗҗәәли вә әгууз‌ү бикә миң фитнәтиль-мәхйә вәльмәмәәт».

«Аллаһым! Җәһәннәм газабыннан, кабер газабыннан, ялганчы Мәсихнең (Дәҗҗалның) фетнәсеннән, үлем һәм яшәү фетнәләреннән сиңа сыенам».