Яулыксыз йөргән кызларның намазы кабул булмый, диләр. Дөресме?

«Хозур» нәшрияты «Дин вә мәгыйшәт» редакциясенең «Дин турында. Сезнең сорауларга җаваплар» телеграм-каналында яулыксыз йөргән хатын-кызларның намазы турында сорауга җавап чыкты.

Көндәлектә яулык ябып йөрмәгән хатын-кызның намазы кабул булмый, диләр. Дөресме?

Бу сорауга җавапны берничә өлешкә бүлү кирәк: Намаз укыган вакытта кеше – гаурәтен, шул исәптән, хатын-кыз башын яулык белән капларга тиеш.

Гаурәтне каплау – намазның шарты булып тора. Шуңа күрә намаз укыганда хиҗабтан булу мәҗбүри.

Намаз шартлары үтәлсә, ул кабул булыр, иншаллаһ.

Ләкин намаздан тыш башка вакытларда да хатын-кызның яулык бәйләве мөһим. Аллаһы Тәгалә бу хакта – Коръәндә, ә Пәйгамбәребез салләллаһү галәйһи вә сәлләм хәдисләрендә хәбәр итә. Галимнәребез дә бертавыштан, хатын-кызның өс-башы капланган булырга тиеш, диләр.

Әби-бабаларыбыз да бу әмерне белгәннәр, башларында хиҗаб яулык булган. Инде әйтергә теләгән төп фикеребезгә килеп җиттек: намаз белән хиҗабның хөкеме төрле.

Ягъни мөслимәгә намаз укымавы өчен – аерым, хиҗабсыз йөрүе өчен аерым гөнаһ языла.

Намаз уку да, хиҗаб кию дә – фарыз гамәлләр.

Хатын-кыз көндәлектә яулыксыз йөрсә дә, берүк намазын ташламасын, намазында ныклы булсын. Әгәр күңелендә изгелеге, ихласлылыгы булса, Аллаһының рәхмәте белән, хиҗаб киюгә дә килер.

Аллаһының рәхмәте киң. Аллаһ Коръәндә: «Дөреслектә, намаз кешене фәхешлектән һәм гөнаһлардан саклар», – ди. Шуңа күрә җиренә җиткереп башкарылган намаз кешене яхшы якка үзгәртә, диелә бу җавапта.