Бала карау буенча пособиеме әллә бердәм түләүме: кайсысы отышлырак?

Дәүләт Думасының бюджет һәм салымнар комитеты рәисе урынбасары Каплан Панеш балалы гаиләләргә бердәм пособие һәм баланы яшь ярымга кадәр карау буенча түләүләрнең кайсын сайларга икәнлеге турында сөйләгән. Аның сүзләренчә, эшләмәүче әниләр өчен – бердәм пособие, югары хезмәт хакы алып эшләүчеләр өчен бала карау буенча пособие отышлырак, ә керем аз булганда барысы да конкрет саннарга бәйле, дип яза «Татар-информ».

Депутат искәрткәнчә, 2023 елдан кертелгән бердәм пособие, шул исәптән, эшләмәүчеләр өчен бала карау буенча пособие дә, элеккеге берничә түләүне алыштырган. Әмма эшләүче ата-аналар өчен ул мөстәкыйль чара буларак сакланып калган, чөнки яшәү минимумына карап түгел, ә хезмәт хакына карап чыгып исәпләнә.

Эшләмәүче әни өчен кайсын сайларга икәне аңлашыла: бала карау буенча минималь пособие якынча 10,8 мең сум тәшкил итә, ә бердәм пособие төбәккә һәм мохтаҗлык дәрәҗәсенә бәйле рәвештә 9-18 мең сумга җитәргә мөмкин. Өстәвенә, ул яшь ярымга кадәр генә түгел, 17 яшькә кадәр үк түләнә.

Эшләүче әниләр өчен хәл катлаулырак. Бала карау буенча пособие уртача хезмәт хакының 40 процентын – аена 10,8 меңнән 83 мең сумга кадәр тәшкил итә. Хезмәт хакы югары булганда ул бердәм пособиедән шактый отышлырак (18 меңгә якын). Әгәр хезмәт хакы аз икән, югарырак булыр дип өметләнергә мөмкин. Әмма бердәм пособие керем яшәү минимумыннан түбәнрәк булганда һәм минималь хезмәт кереме кагыйдәсен исәпкә алып кына билгеләнә: гаиләнең эшкә сәләтле һәр әгъзасы, нигезле сәбәпләр булмаса, бер ел эчендә кимендә сигез минималь хезмәт хакы (216,7 мең сум) күләмендә акча эшләргә тиеш.

Панеш сүзләренчә, бер бала өчен ике түләүне дә бергә алып булмый. Тик кечкенә баланы караган өчен пособие һәм олы балалар өчен бердәм пособиене берьюлы алырга була.