Новости за 24.12.2024

Башкортстан Республикасы башкаласында «Ufa.Tatar» форумы узды. Форум кысаларында «Замана шәһәрендә без кемнәр?» дип аталган пленар утырышта катнашкан Бөтендөнья татар конгрессының Башкортстандагы вәкиле Альфред Дәүләтшин милләт киләчәге турында фикерләре белән уртаклашты.

Киләсе 2025 елның 1 июленнән Татарстанда табигый газның бер кубометры ваклап сату бәясе (өстәлгән бәягә салымны (НДС) исәпкә алып) 94 тиенгә – 7,47 сумнан 8,41 сумга кадәр артачак. ТР Тарифлар буенча дәүләт комитетының карар проекты әлегә коррупциягә каршы экспертиза уза.

Россия мөселманнары Диния нәзарәте Голәмәләр шурасы күпхатынлылыкны рөхсәт итүче фәтваны кире алды. Бу хакта хәбәр шура рәисе Шамил Аляутдиновның телеграм-каналында чыкты, дип яза РИА Новости.

Мәдәни инициативалар президент фонды фигуралы шуу буенча олимпия чемпионы Алина Заһитовага яңа «Алые паруса» боз тамашасын булдыру өчен грант бирүдән баш тартты. Бу хакта фонд сайтында хәбәр ителә.

Киләсе 2025 елның 1 апреленнән бөтен Россиядә мигрантларның балаларын мәктәпкә кабул итү өчен рус теленнән тест уздыра башлаячаклар. Бу хакта РФ вице-премьеры Дмитрий Чернышенко сөйләде, дип хәбәр итә РИА Новости.

Россия Финанс министрлыгы, башка ипотека программалары белән бәйле диспропорцияләрне искәртеп, махсус хәрби операциядә катнашучылар өчен ташламалы ипотека программасын булдыру тәкъдимен хупламады. Бу хакта тиешле документка сылтама белән РИА Новости хәбәр итә.

Икътисадтагы агымдагы вәзгыятьне исәпкә алып, Россиядә төп ставканы киметү куркыныч. Чөнки «эшче көчләр» һәм башка ресурслар кытлыгы шартларында хезмәт хакларына чыгымнар арту һәм, нәтиҗә буларак, инфляция тагын да ныграк тизәю ихтимал. Җитештерүчеләр инвестицияләргә «арзан акчалар» юнәлткән очракта да вакыйгалар шундый ук сценарий буенча барачак. Россия Үзәк банкы Дәүләт Думасы депутаты Денис Парфеновка (КПРФ) шундый җавап бирде.

Алабуга районында янгында алты эшче һәлак булганнан соң прокуратура процессуаль тикшерү оештырды. Бу хакта күзәтчелек ведомствосы матбугат хезмәте хәбәр итә.

Дәүләт Думасы Рәисе урынбасары Борис Чернышов («ЛДПР») РФ Генераль прокуроры Игорь Красновка ашыгыч ярдәм автомобильләренең хәрәкәтенә аңлы рәвештә комачаулаган, шул исәптән хастаханәләргә һәм медицина учреждениеләренә керү юлларын япкан өчен җинаять җаваплылыгы кертү инициативасы белән мөрәҗәгать итте, дип яза РИА Новости.

«Китап» радиосы баш мөхәррире, татар бүлеген тәмамлаган Алмаз Миргаязов Татар халык хоры концертын тормышындагы бик үзенчәлекле һәм истә кала торган мизгел булганын, җырларның партияләре әле дә истә булуын әйтте. Концерт Казан университетының ачылуына 220 ел тулу, 1967 елдан башлап хорның нигезен тәшкил иткән студентларның нигезе – Татар теле һәм әдәбияты бүлеге оешуга 80 ел тулу уңаеннан уздырылды.

Татарстан Рәисе Рөстәм Миңнеханов республика агрофермаларының эшчеләре вакытлыча яшәү өчен кулланыла торган барлык биналарны тикшерергә кушты. Бу хакта ТР Рәисе матбугат хезмәте җитәкчесе Лилия Галимова хәбәр итте.

Татарстанда 2024 елгы авто- һәм мотоспорт сезонына йомгак ясалды. ТР Рәисе Рөстәм Миңнеханов (элек үзе дә профессиональ автоузышчы, халыкара класслы спорт мастеры һәм Россиянең атказанган спорт мастеры) спортчылар ирешкән нәтиҗәләрне югары бәяләде, дип хәбәр итә республика җитәкчесе матбугат хезмәте.

Төнлә Татарстан Республикасы Алабуга районының Малореченский бистәсендәге терлекчелек комплексы территориясендә эшчеләрне вакытлыча урнаштыру өчен каралган йортта янгын чыккан.

Бүген Казанда «Казан» гаилә үзәге янында шәһәрнең төп чыршысы ачылу сәбәпле, Сибгать Хәким урамының бер өлешендә хәрәкәт чикләнәчәк. Бу хакта шәһәр Дәүләт автоинспекциясе хәбәр итә. Юл 17:00 сәгатьтән 22:00 сәгатьтә кадәр йөрү өчен ябык була.

Гыйнвар пенсияләре гадәттәгечә декабрь ахырында киләчәк. Россия Социаль фонды мәгълүматы буенча, 28 декабрьгә кадәр һәр айның бересеннән тугызына кадәр банклар аша алучыларга гыйнвар өчен вакытыннан алда түләүләр киләчәк.

«Гадел Россия - дөреслек өчен» партиясе рәисе Сергей Миронов РФ премьер-министры Михаил Мишустин исеменә Хезмәт Кодексында эш бирүчеләрнең Яңа ел алдыннан 13 нче хезмәт хакын мәҗбүри түләү турындагы норманы беркетү тәкъдиме белән хат юллады. Бу хакта ТАСС яза.

Татарстанда бүген иртән явым-төшем көтелми, әмма урыны белән томан булуы ихтимал. Көндез һәм кич республикада бераз кар явачак, дип фаразлана ТР Гидрометеорология үзәге.

Түбән Камада Яшь тамашачы театрында махсус хәрби операциядә катнашучыларның балалары өчен район башлыгы чыршысы булды. Аларга әкияти спектакль күрсәтте һәм татлы бүләкләр тапшырдылар. Бу хакта https://tat.e-nkama.ru/ сайтында хәбәр иттеләр.

Чирмешән районы Күтәмә авылыннан махсус хәрби операция зонасында хезмәт итүче Раил Шәрифуллинның әнисенә хәрәкәтләнү өчен инвалид коляскасы тапшырдылар. Бу хакта «Безнең Чирмешән» сайтында Марат Гомәров яза.

Аксубай районы җитәкчеләре «Теләкләр чыршысы» бөтенроссия акциясенә кушылды. Районның беренче затлары игелекле тылсымчылар сыйфатында чыгыш ясады һәм махсус хәрби операциядә катнашучыларның балаларының теләкләрен үтәделәр. Бу хакта «Авыл таңнары» хәбәр итә.

Үзәк чыршыны ачу тантанасында Минзәлә районында Яңа ел бизәлеше конкурсы җиңүчеләрен билгеләп үттеләр. Җиңүчеләрне район башлыгы Айдар Салахов котлады. Бу хакта «Минзәлә» сайтында Илшат Вәгыйзов хәбәр итә.

Актанышта яшәүчеләр өчен аеруча истәлекле булды - районның Үзәк чыршысы утларын кабызды. Тантаналы матур чарада Актаныш районы башлыгы Ленар Зарипов та катнашты. Бу хакта «Актаныш» сайтында Ләйсән Газизова хәбәр итә.