Новости за 26.12.2024

Татарстан Нурлат муниципаль районының Каравыл Тавы авылында хәйрия концерты-марафонында махсус хәрби операциядә катнашучыларга ярдәм итеп 100 мең сум акча җыйганнар.

Татарстанның атказанган артисты, Муса Җәлил исемендәге Татар дәүләт опера һәм балет театрының әйдәп баручы солисты, уникаль тембр иясе Артур Исламов һәи артистның аерым үзенчәлеге булырга тиеш дигән фикердә.

Татарстан территориясендә шәһәр яны тимер юл транспортында пассажирларны йөртү тарифының икътисади нигезләнгән дәрәҗәсе ун километрлы зона өчен 37,90 сумнан 41,28 сумга кадәр артырга мөмкин (ягъни 3,38 сумга). ТР Тарифлар буенча дәүләт комитеты карары проекты әлегә коррупциягә каршы экспертиза уза.

Татарстан Дәүләт Советы Рәисе Фәрит Мөхәммәтшин татар милләтеннән булган депутатлар туган телләрен онытмаска, сөйләм дәрәҗәсендә булса да, өйрәнергә тиеш дип саный. Бу хакта ул журналистларга йомгаклау матбугат очрашуында хәбәр итте.

Салих Сәйдәшев исемендәге Зур концертлар залында Нәҗип Җиһанов исемендәге Казан дәүләт консерваториясенең концерт камера оркестры «Яңа ел серпантины» дип исемләнгән концерт оештырды. Кичәдә дөнья күләмендә билгеле булган, танылган әсәрләр яңгырады.

Татарстан Премьер-министры урынбасары — Татарстанның Россиядәге Тулы вәкаләтле вәкиле Равил Әхмәтшин музыкант-торбачылар Шамил һәм Ильяс Невретдиновлар, органчы Тимур Хәлиуллин белән очрашты. Бу хакта Татарстанның Россиядәге Тулы вәкаләтле вәкиллек матбугат хезмәте хәбәр итә.

Түбән Новгородның Уразавылы мәдәният йортында өлкәнең өлкән яшьтәге татар авыллары вәкилләре арасында «Минем ягымлы әбием» II өлкәара конкурсы булып узды. Аны Краснооктябрьск округы хакимияте ярдәме белән Түбән Новгород татарлары конгрессы оештырды. Бу хакта Бөтендөнья татар конгрессы матбугат хезмәте хәбәр итә.

Татарстанда җәмәгать транспортында билетсыз йөргән өчен штраф 8 тапкырдан артыкка артты, 300 сумнан 2,5 мең сумга кадәр җитте. Бу хактагы республика законын Татарстан Рәисе Рөстәм Миңнеханов имзалады.

Бүген, 26 декабрьдә, Татарстанда һава температурасының бераз күтәрелүе көтелә. Бу хакта Татарстан Гидрометеорология һәм әйләнә-тирә мохитне күзәтү үзәге хәбәр итә.

Төмәннең «Яңарыш» газетасында Рәүфә Кангазинаның «Газета юбилеена әзерлек башланды» дигән язмасы чыкты.

Самара өлкәсенең Иске Ярмәк авылының Халик Садри исемендәге мәдәният йортында «Динар дусларын җыя-6» дип аталган җырлы-биюле тамаша үтте. Динар Гариповны хөрмәтләп килгән сәхнәдәш дуслары — барысы бергә җыелып, мәдәният учагының дуслык кичәсен җанландырып җибәрделәр. Шулай итеп концертта районыбызның иң талантлы җырчылары, сүз осталары һәм биючеләре катнаштылар, дип хәбәр итте «Самара татарлары» сайты.

Самараның «Бердәмлек» газетасында Эльмира Сәйфуллинаның «Казанга кемнәр бара?» дигән язмасы чыкты.

21 декабрь көнне Аяз Гыйләҗев исемендәге Чаллы татар дәүләт драма театры бинасында ел да була торган «Ак калфак» милли костюм фестивале булды. Биредә кул эшләнмәләре ярминкәсе, мастер-класслар узды. Күргәзмә залында милли костюмнар конкурсы узды, җиңүчеләр күркәм бүләкләр алды. Бу турыда Татарстан Мәдәният министрлыгы хәбәр итте.

Кукмара районында биш һәм аннан күбрәк бала тәрбияләүче гаиләләргә депутат Илья Вольфсонның Яңа ел бүләкләре тапшырылды. Күчтәнәчләр биш һәм аннан күбрәк бала тәрбияләүче 54 гаиләгә бирелде. Бу хакта «Хезмәт даны» сайтында Алсу Сәлахетдинова яза.

Алабуга укучылары, абыйлы-энеле Эрик һәм Рафаэль Булхановлар, «Безнең заман геройлары» дип танылды. Ә бит аларга нибары 11 һәм 8 яшь. Татарстан башкаласында «Безнең заман герое» республика премиясен тапшыру тантанасында алар «Волонтерлар» номинациясендә «Яшь герой» медальләре белән бүләкләнде. Бу хакта «Алабуга нуры» яза.

Әтнә районы махсус хәрби операциядә катнашучыларга Яңа ел күчтәнәчләре белән гуманитар ярдәм җибәргән. Бу хакта «Әтнә таңы» хәбәр итә.

Чистайның Никахлашу сараенда юбиляр парларны һәм күп балалы гаиләне хөрмәтләделәр. Чарага өч гаилә: Татьяна һәм Владимир Шведчиковлар, Равилә һәм Дамир Мортазиннар, шулай ук Айсылу һәм Илдус Сабировлар чакырылган иде. Бу хакта «Чистай хәбәрләре» яза.

Зәйдә тантаналы төстә, ил иминлеген саклап яу кырында һәлак булган 6 батыр хәрбигә бирелгән Батырлык орденнары, аларның әти-әниләре, тормыш иптәшләренә тапшырылды. Бу хакта «Зәй яңалыклары»нда Энҗе Әгъләмова яза.