Новости за 07.02.2025

ТР вице-премьеры – Татарстанның Россиядәге тулы вәкаләтле вәкиле Равил Әхмәтшин Казан дәүләт мәдәният институты ректоры Роза Әхмәдиева белән башкалада уртак мәдәни проектлар гамәлгә ашыру хакында фикер алышты.

Ел саен үткәрелә торган «Нәселебез шәҗәрәсе» бәйгесе старт алды. Бу хакта «Татар-информ»да узган матбугат очрашуында «Гаилә» мәчете имам-хатыйбы, бәйгене оештыручыларның берсе Рөстәм хәзрәт Хәйруллин әйтте.

Татарстан Премьер-министры Алексей Песошин Бөгелмәгә эш сәфәре кысаларында тыл хезмәтчәннәренә «1941-1945 еллардагы Бөек Ватан сугышында Җиңүнең 80 еллыгы» юбилей медальләрен тапшырды.

Татарстанның Дәүләт гербы (бүген аңа 33 ел тула), флаг һәм гимн белән бергә, республиканың күпмилләтле халкы өчен берләшү символына әверелде. ТР Дәүләт Советы Рәисе Фәрит Мөхәммәтшин телеграм-каналында шулай дип язган.

Татарстан Рәисе Рөстәм Миңнеханов «ВКонтакте» социаль челтәрендәге сәхифәсендә һәм Telegram-каналда республика халкын Татарстанның Дәүләт гербы көне белән тәбрик итте.

Тубыл шәһәренең себер-татар мәдәният үзәгенең әдәби кунак бүлмәсендә Галия Абайдуллинаның «Шигърияткә сыя барысы...» дип аталган әдәби кичәсе узды. Бу хакта «Яңарыш» газетасының телеграм-каналында хәбәр ителә.

Ике ай дәвамында Ислам динен кабул итүгә 1000 ел исемендәге Казан мәдрәсәсендә «Татар азаны мәктәбе» проекты узды. Әлеге курс кысаларында татар мәкаме белән азан әйтү буенча дәресләр офлайн һәм дистанцион форматта мәдрәсәнең көндезге уку бүлеге шәкертләре өчен үткәрелде. Бу хакта ТР Диния нәзарәте матбугат хезмәте хәбәр итә.

Бурятия Республикасы Заиграевск районында татар кабартмасына һәйкәл куярга ниятлиләр. «Сангудач» татар мәдәнияте үзәге башлыгы Рәшидә Зәйнетдинова мондый карарның Бөек Ватан сугышы елларында балаларны милли кабартма белән тукландырган Бурятиядә яшәүче татар хатын-кызларының батырлыгы истәлегенә кабул ителүен аңлатты.

Җомга көнне, 7 февральдә, Татарстанда алмашынучан болытлы һава, явым-төшем көтелми.

Татарстан Республикасы Дәүләт Советы Рәисе Фәрит Мөхәммәтшин Татарстан Республикасы Дәүләт гербы көне белән котлады.

Шушы көннәрдә Кукмара районыннан махсус операциядә катнашучы хәрбиләргә гуманитар ярдәмнең чираттагы 46нчы партиясен илттеләр. Аны район башлыгы Сергей Димитриев озата барды. Бу хакта «Хезмәт даны» сайтында Эльвира Иванова хәбәр итә.

Әлмәт түрәләре шәһәр халкы инициативасы буенча гамәлгә ашырыла торган беренче сынау проектын тәкъдим итте. «Хакатон» халыкара нефть-газ яшьләр форумында әлмәтлеләр шәһәр мохитен яхшырту өчен идеяләр тәкъдим итте. Алар арасында җәяүлеләр кичүләрендә лазер проекциясен куллану да бар иде. Бу инициативаны район башкарма комитеты җитәкчесе Гүзәл Хәбетдинова да хуплады. Бу хакта «Әлмәт таңнары» яза.

Бөгелмәдә Бөек Ватан сугышы ветераннарын һәм махсус хәрби операция геройларын бүләкләделәр. Ватанны саклаучылар елын ачу уңаеннан чараны Яшьләр сараенда уздырдылар. Бу хакта «Бөгелмә авазы» хәбәр итә.

Минзәлә колониясендә хөкем срогын үтүче хатын кияүгә чыккан. Дин әһеле 36 яшьлек ир белән хатынның гаиләсен теркәгән. Бу хакта «Шәһри Чаллы» сайтында Зөлфия Галим яза.