Мәскәү Татар мәдәни үзәге коллективлары Яңа бистә паркында Сабан туе репетициясен үткәрде
Мәскәүнең Татар мәдәни үзәге иҗат коллективлары, шулай ук башкорт һәм чуваш артистлары Яңа бистә паркында 2024 елгы Мәскәү гомумшәһәр Сабан туеның «генераль репетициясе»н үткәрде. Бу хакта Мәскәү шәһәре татар милли-мәдәни автономиясе төбәк иҗтимагый оешмасының матбугат хезмәте хәбәр итә.
Бәйрәмне Таганка районы татар милли-мәдәни автономиясе башлыгы Рәфыйк Вәлитов оештырды. Бәйрәм башланыр алдыннан җыелган халыкны Татарстанның Россиядәге Тулы вәкаләтле вәкиле урынбасары Эмиль Фәйзуллин, Үзәк административ округы префекты урынбасары Лариса Тиунова, Мәскәү татарлары автономиясе башлыгы Фәрит Фарисов, Башкортстанның Россиядәге Тулы вәкаләтле вәкиле киңәшчесе Дмитрий Кононов сәламләде.
Сәхнәдә татар һәм чуваш җырлары яңгырады. Хореография башкорт биюләре белән тәкъдим ителде. Моннан тыш, сәхнә янындагы аллеяларда татар һәм чуваш халкының көнкүреш әйберләре һәм милли киемнәре урын алган күргәзмәләр оештырылган иде. Балалар һәм олылар өчен милли стильдә вак-төяк әйберләр ясау буенча мастер-класслар үткәрелде.
Чара дусларча атмосферада узды, диелә хәбәрдә.