Татарстан хәрби-тарихи җәмгыяте махсус операция турында фильмнар сериясен тәкъдим итте

Россия хәрби-тарихи җәмгыятенең Татарстандагы төбәк вәкиллеге Сугыш хәрәкәтләре ветераннары көне уңаеннан «СВОИ» дип аталган кыска метражлы фильмнар циклын тәкъдим итте. Алты роликтан торган серия үз иленең язмышына битараф булмаган ватандашлар хакында сөйли.

Төбәк бүлеге социаль челтәрләрендә безнең заман геройларына – алгы сызыкта лаеклы хезмәт итүчеләргә, тылда тотрыклылыкны тәэмин итүчеләргә, гуманитар ярдәм илтүчеләргә һәм тарихи хәтерне саклаучыларга багышланган кыска фильмнар тәкъдим ителгән.

Цикл алты фильмнан тора, алар аеруча мөһим аспектларны – алгы сызыктагы беренче адымнардан алып хәзерге вакытта Казанда яшәүчеләрнең шәхси тарихларына кадәр – колачлый. Тамашачылар гуманитар ярдәм илтүнең кыенлыкларын гына түгел, ә сугыш чынбарлыгы белән очрашкан кешеләрнең кичерешләрен, өйгә кайтканнан соңгы тормышын да күрә алачак.

Проект командасының төп бурычы – арттырмыйча чын тарихны сөйләү һәм күп кенә кешләрне борчыган сорауларга җавап бирү. Өч аерым серия 430 һәм 1234нче полк хәрбиләренә багышланган. Аларның тарихлары охшаш булса да һәм бер вакыйга белән бәйләнсә дә, төп элемтә – сугышчан туганлык.

Серияләр 1-6 июльдә Россия хәрби-тарихи җәмгыятенең Татарстандагы төбәк вәкиллеге рәсми сайтында урнаштырылыр дип көтелә.

Проект ТР Яшьләр эшләре министрлыгы һәм республиканың «Форпост» яшьләр берләшмәләре үзәге ярдәмендә гамәлгә ашырыла. Ул 2024 елда Татарстанның «Яшьләр өчен төбәк» Бөтенроссия бәйгесендә җиңүе кысаларында гамәлгә ашырыла һәм бу проектның әһәмиятен тагын да арттыра.