Չեմպիոնների լիգայի որակավորման առաջին փուլի պատասխան խաղում «Փյունիկը» պարտվեց «Դինամոյին»
Հուլիսի 16-ին Չեմպիոնների լիգայի որակավորման առաջին փուլի շրջանակում «Փյունիկը» Երևանում ընդունել էր Մինսկի «Դինամոյին»։
Հանդիպման մեկնարկում ավելի ակտիվ էին երևանյան թիմի ֆուտբոլիստները, 14-րդ րոպեին Օտուբանջոն լավ հնարավորություն ստացավ, սակայն այդ դրվագում գոլ չգրանցվեց։ Տասը րոպե անց Յուսուֆը նորից լավ հարված կատարեց, երբ ստացավ գնդակը տուգանային հարվածից հետո մրցակցի ֆուտբոլիստների անդրադարձից․․․ բայց լուսատախտակին հաշիվը չփոխվեց։
34-րդ րոպեին արդեն մրցակցի ֆուտբոլիստ Մելնիչենկոն հարված կատարեց մեր թիմի դարպասին, սակայն Ավագյանը տեղում էր։ Քիչ անց բելառուսցիները ևս մեկ հարված կատարեցին դեպի դարպասը, սակայն այս անգամ արդեն շեղ։ 43-րդ րոպեին արդեն Մայան նպաստավոր դիրքից հարվածեց, բայց վստահ խաղաց Լապուխովը, իսկ մինսկյան թիմի հակագրոհի դրվագում փայլեց արդեն մեր դարպասապահը՝ Ավագյանը։ Այսպիսով, առաջին խաղակեսում գոլեր չգրանցվեցին և թիմերը ընդմիջման գնացին 0-0 հաշվով։
Երկրորդ խաղակեսի մեկնարկում թիմերը փոխանակվեցին վտանգավոր գրոհներով, բայց այս դիմակայությունում թիմերի դարպասները շարունակում էին մնալ անառիկ։ 61-րդ րոպեին Մելիքյանի թիմը մոտ էր հաջողության, սակայն մրցակցի դարպասապահին օգնության հասավ դարպասաձողը։ Խաղավերջում մրցակիցը ստացավ 11-մետրանոց հարվածի իրավունք․ Գավրիլովիչի հարվածը դիպուկ էր։ Սա այս դիմակայությունում միակ գոլն էր։ Սկրիպչենկոյի թիմը հաղթեց 1-0 հաշվով և կշարունակի պայքարը ՉԼ-ի որակավորման երկրորդ փուլում։
Հիշեցնենք, որ թիմերի միջև առաջին խաղն ավարտվել է գոլազուրկ ոչ-ոքի։ «Փյունիկը» եվրագավթներում պայքրաը կշարունակի Կոնֆերենցիաների լիգայի երկրորդ փուլում։