Հունաստանում ծեծի են ենթարկել Սալոնիկի 75-ամյա քաղաքապետին (տեսանյութեր)
Հունաստանում Պոնտոսի հույների ցեղասպանության զոհերի հիշատակի օրվա առնչությամբ կազմակերպված միջոցառումների ժամանակ ծեծի են ենթարկել Սալոնիկի քաղաքապետ Յանիս Բուտարիսին: Այդ մասին հայտնում է The Washington Post-ը:
Միջոցառման ժամանակ 75-ամյա քաղաքապետին է մոտեցել մոտ 10-12 մարդ՝ պահանջելով հեռանալ միջոցառման անցկացման վայրից: Երբ քաղաքապետը հրաժարվել է, նրան գցել են գետնին և սկսել ծեծել:
Բուտարիսին հիվանդանոց են տեղափոխել, վնասված են նրա գլուխը, մեջքը և ոտքերը:
Ինչպես նշվում է՝ Սալոնիկի քաղաքապետը Հունաստանի և Թուրքիայի մերձեցման կողմնակից է և հայտնի է իր բացահայտ հակաազգայնական դիրքորոշմամբ:
Հունաստանի վարչապետ Ալեքսիս Ցիպրասը հարձակվողներին «ծայրահեղ աջակողմյան ավազակներ» է անվանել, որոնք «վաղ թե ուշ ստիպված են լինելու պատասխան տալ իրենց արածի համար»:
Հաղորդվում է, որ ոստիկանությունը ձերբակալել է երկու կասկածյալի: