Ռուս պրանկերները Նիկոլ Փաշինյանի անունից զանգահարել են ԵԱՀԿ գլխավոր քարտուղարին (տեսանյութ)
Ռուս պրանկերներ Վովանը (Վլադիմիր Կուզնեցով) և Լեքսուսը (Ալեքսեյ Ստոլյարով) այս անգամ ՀՀ վարչապետ Նիկոլ Փաշինյանի անունից զանգահարել են ԵԱՀԿ գլխավոր քարտուղար Թոմաս Գրեմինգերին:
Ինչպես հաղորդում է «Արմենպրես»-ը, ռուսական vesti.ru-ն հայտնում է, որ Գրեմինգերը շնորհավորել է Փաշինյանին ՀՀ վարչապետի պաշտոնը ստանձնելու կապակցությամբ:
«Ես ցանկանում եմ հավաստիացնել, որ ԵԱՀԿ-ն աջակցում է ցանկացած բարեփոխումների, որը մտադիր է իրականացնել Հայաստանը: Մասնավորապես, տեղեկանալով ընտրություններից առաջ ընտրական օրենսգրքում փոփոխություններ կատարելու վերաբերյալ ձեր ծրագրերի մասին՝ ցանկանում եմ տեղեկացնել, որ ԵԱՀԿ-ն, մասնավորապես Ժողովրդավարական ինստիտուտների ու մարդու իրավունքների գրասենյակը, պատրաստ են աջակցել Ձեր այդ նախաձեռնությունը»,- ասել է Գրեմինգերը:
Հիշեցնելով, որ ԵԱՀԿ/ԺՀՄԻԳ-ը Հայաստանի խորհրդարանական վերջին ընտրություններում դիտորդական առաքելության արդյունքներով որոշակի դիտարկումներ էր արել, որոնք փոխանցվել էին ՀՀ իշխանություններին՝ Գրեմինգերը նկատել է, որ այդ նկատառումները կարող են օգտագործվել ԸՕ-ում փոփոխություններ անցկացնելու ժամանակ:
ՀՀ վարչապետի անունից պրանկերները հետաքրքրվել են, թե ով է մեղավոր Մինսկի համաձայնությունների չկատարման համար: ԵԱՀԿ գլխավոր քարտուղարը պատասխանել է, որ պատճառը, թերևս, կողմերի քաղաքական կամքի բացակայությունն է:
Ավելի վաղ ռուս պրանկերներ Վովանն ու Լեքսուսը վարչապետ Նիկոլ Փաշինյանի անունից զանգահարել էին Մեծ Բրիտանիայի արտաքին գործերի նախարար Բորիս Ջոնսոնին և զրուցել շուրջ 30 րոպե: