Օսկարակիր Ջենիֆեր Լոուրենսի մասնակցությամբ Dior-ի նոր ֆոտոշարքն աղմուկ է բարձրացրել (լուսանկարներ)
Ֆրանսիական Dior նորաձևության տունն օսկարակիր դերասանուհի Ջենիֆեր Լոուրենսի մասնակցությամբ նոր գովազդային ֆոտոշարքի պատճառով հայտնվել է քննադատության թիրախում:
Ինչպես նշում է Daily Mail-ը, բրենդը քննադատվել է նրա համար, որ մեքսիկական մշակույթի թեմայով ֆոտոշարքում ծագումով մեքսիկուհի մոդել ընտրելու փոխարեն, լատինամերիկյան երկրի հետ որևէ առնչություն չունեցող դերասանուհու է նախապատվություն տվել:
Խոսքը Dior Cruise 2019 հավաքածուի մասին է: Լոուրենսը պատմել է, որ հավաքածուն ստեղծվել է մեքսիկուհիներով ոգեշնչված դիզայներների կողմից:
Քննադատները նորաձևության տանը մեղադրել են օտար մշակույթից օգուտ քաղելու, սակայն դրա նկատմամբ ոչ հարգալից վերաբերմունք ցուցաբերելու համար:
Թեև Լոուրենսը 2012թ. ի վեր Dior-ի գովազդային դեմքն է, այնուհանդերձ՝ տվյալ ֆոտոշարքին նրա մասնակցությունը քննադատվել է:
«Dior-ի վերջին հավաքածուն նվիրված է մեքսիկուհիներին, բայց դրա գովազդում նկարահանվել է սպիտակամաշկ Լոուրենսը: Ընտրեք մեքսիկացի մոդել»,-գրել է օգտատերերից մեկը: