Համացանցում է հայտնվել «Շերեմետևո»-ում ՀՀ քաղաքացուն հարվածած Boeing-737 ինքնաթիռի օդաչուների խոսակցությունը (տեսանյութ)
Համացանցում է հայտնվել Մոսկվայի «Շերեմետևո» օդանավակայանի թռիչքուղու վրա ՀՀ քաղաքացուն հարվածած Boeing-737 ինքնաթիռի օդաչուների խոսակցությունը:
YouTube-ում հրապարակված տեսանյութում լսվում է, որ Մոսկվա-Աթենք չվերթն իրականացնող օդանավի օդաչուն դիսպետչերներին հայտնում է, որ ինքնաթիռը, ամենայն հավանականությամբ, բախվել է «նապաստակի» և որ դա որևէ կերպ չի խանգարի օդանավի անվտանգ թռիչքին:
Ռուսաստանի Դաշնությունում Հայաստանի Հանրապետության դեսպանատունն ավելի վաղ հաստատել է Մոսկվայի «Շերեմետևո» օդանավակայանի թռիչքուղու վրա ՀՀ քաղաքացու մահվան մասին տեղեկատվությունը:
Մահացածի ինքնությունը հայտնի է, նա 1993թ. ծնված Ա.Գ. Եփրեմյանն է:
Ինչպես ավելի վաղ հայտնել է Tert.am-ը, մահացած տղամարդը հայրենիք էր արտաքսվել Իսպանիայից: Մադրիդից Մոսկվա չվերթի ժամանակ նա իրեն վատ է պահել, և օդանավի անձնակազմը վայրէջքից հետո ստիպված է եղել դիմել իրավապահ մարմինների օգնությանը:
Դեպքի օրը Մոսկվայից Աթենք թռչող օդանավի անձնակազմը հայտնել է, որ թռիչքուղով ընթանալու ժամանակ ինքնաթիռն, ամենայն հավանականությամբ, բախվել է ինչ-որ կենդանու: Թռիչքուղի են ուղարկվել օդանավակայանի անվտանգության աշխատակիցները, որոնք հայտնաբերել են տղամարդու դի: Ավելի ուշ հաղորդվել է, որ մահացածը ՀՀ քաղաքացի է: