ჯო ბაიდენმა სი ძინპინს დიქტატორი უწოდა
აშშ-ის პრეზიდენტმა ჯო ბაიდენმა სი ძინპინს დიქტატორი უწოდა, როდესაც მან აშშ-ის თავზე ჩინური საჰაერო ბუშტის ჩამოგდებაზე ჩინეთის პრეზიდენტის მიერ გაკეთებულ განცხადებაზე ისაუბრა.
ბაიდენმა აღნიშნა, რომ საჰაერო ბუშტს აშშ-ის საჰაერო სივრცე არ უნდა გადაეკვეთა.
„სი ძინპინი განაწყენდა, როდესაც ეს ბუშტი ჩამოაგდეს. მისი თქმით, არ იცოდა, რომ ბუშტი იქ [აშშ-ის სანაპიროსთან] იყო და ეს არის ის, რაც დიქტატორებს ნამდვილად არ მოსწონთ, როდესაც მათ არ იციან, რა ხდება“, – განაცხადა ბაიდენმა.
ასეთი განცხადება აშშ-ის პრეზიდენტმა სახელმწიფო მდივნის, ენტონი ბლინკენის პეკინში ვიზიტიდან ერთი დღის შემდეგ გააკეთა, სადაც ის ჩინეთის სახალხო რესპუბლიკის ლიდერს და სხვა მაღალჩინოსნებს შეხვდა.