د طالبانو مشر د دفاع او کورنيو چارو وزارتونو او استخباراتو رياست څخه د وسلو د وېش واک اخيستی

د راپورونو له‌مخې د طالبانو مشر د یوې فرمان په صادرولو سره له کورنیو چارو وزارت، دفاع وزارت او استخباراتو ریاست څخه د وسلو، مهماتو او پوځي تجهیزاتو د وېش واک اخیستی دی.


دا خبر طلوع نیوز خصوصي رسنۍ د طالبانو د ویاند ذبیح‌الله مجاهد له خولې ورکړی چې، د خپل مشر ملاهبت‌الله اخندزاده له‌خوا د اته ماده‌ییز فرمان صادرېدل تایید کړي.


په فرمان کې يې زیاته کړې ده چې، د وسلو د سمې کارونې او خوندیتوب په موخه به تر دې وروسته هر ډول وسلې او مهمات د طالبانو د مشر په حکم کارول کېږي.


پخپله ښاغلي مجاهد په خپلو ټولنیزو شبکو کې په‌دې اړه څه نه‌دي ویلي.