اوکراین وايي، د روسیې په کورسک سیمه کې يې د شمالي کوریا ځواکونو ته مرګژوبله اړولې ده

اوکراین د روسیې په لویدیځه کورسک سیمه کې د شمالي کوریا هغو ځواکونو ته چې د روسیې په ملاتړ جګړه کوي د مرګ ژوبلې د اړولو خبر ورکوي.


د اوکراین پوځي استخباراتو نن (د ډسمبر ۱۶مه) په یوه بیان کې وویل چې لږترلږه دېرش تنه کوریايي سرتېري مړه یا ټپیان شوي دي. په بیان کې راغلي دي چې کوریايي ځواکونو ته درنه مرګ ژوبله اوښتې ده.


وروسته له دې چې پیونګ یانګ د روسیې جګړې ته خپل سرتېري واستول، دا لومړی ځل دی چې کییف د هغوی د مرګ ژوبلې په اړه دقیق معلومات ورکوي. آزادي راډيو د اوکراین دا ادعا په خپلواک ډول نه شي تاییدولای. اوکرایني ځواکونو د روان کال په اګست کې د روسیې د کورسک سیمې یوشمېر ناحیې ونیولې او تراوسه هم پر ځینو سیمو ولکه لري.