Бернардо Силва: Де Брюйненинг кетишини қабул қилиш қийин бўлди
Манчестер Сити ярим ҳимоячиси Бернардо Силва Кевин де Брюйне жамоани тарк этиши ҳақида илк бор қандай хабар топгани ҳақида сўзлаб берди. Бельгиялик футболчи ўтган мавсум охирида "шаҳарликлар" сафини тарк этди ва ёзда эркин агент сифатида Италиянинг "Наполи" клубига ўтди.
"Кевин бу ҳақида менга ўша мавсум охирида айтган эди. Бу жуда оғир бўлди, чунки у менинг дўстим.
Биз саккиз йил давомида бир жамоада ўйнадик ва унинг Манчестер Ситидан кетишини қабул қилиш осон эмас эди. Энди мен жамоа сардориман, бу катта шараф", деди Силва DAZN мухбирига берган интервьюсида.
Кевин де Брюйне Манчестер Сити сафида ўн йил давомида тўп сурган. Яқинда 34 ёшли ярим ҳимоячи оғир жароҳат олиб, яқин ойлар давомида Наполига ёрдам бера олмайди.