Почеттино Месси, Неймар ва Мбаппени бошқариш қийин деди
ПСЖ собиқ бош мураббийи Маурисио Почеттино юлдуз футболчилар билан ишлаш осон эмаслигини таъкидлади. Аргентиналик мутахассис Парижда ҳужум чизиғида Лионел Месси, Неймар ва Килиан Мбаппе учлигини бошқарган. Бу ҳақда euro-football.ru хабар беради.
Почеттинонинг фикрича, бу даражадаги футболчилар баъзан ўйнаётган клубидан ҳам каттароқ таъсирга эга бўлади. У, хусусан, Мессидан доимий прессинг кутиш нотўғри эканини айтиб, Лео Гвардиола давридаги энг яхши йилларида ҳам буни мунтазам қилмаганини эслатди. Мураббий The Touchline нашрига кўра, натижа бўлмаса, айб кўпинча бош мураббий зиммасига юкланишини қўшимча қилган.
Ҳозирда Почеттино АҚШ терма жамоасини жаҳон чемпионатига тайёрламоқда. ОАВда эса у ёзда яна “Тоттенҳем”га қайтиши мумкинлиги ҳақида миш-мишлар тарқалган.