Жезуш Роналдуни навбатдаги учрашувда дам олдиради

«Ан-Наср» бош мураббийи Жорже Жезуш Криштиану Роналдунинг яқинлашиб келаётган ўйинда майдонга тушмаслигига изоҳ берди. Бу ҳақда euro-football.ru хабар беради.

Ар-Риёд клуби чоршанба куни ОФК Чемпионлар лигаси доирасида «Аркадаг»га қарши баҳс олиб боради. Португалиялик ҳужумчининг тез орада майдонга қайтиши кутилаётган бўлса-да, бу сафар ҳам у қайдномадан жой олмайди.

Жезушнинг таъкидлашича, жамоа зич тақвим сабаб Роналдуни ва асосий таркибдаги яна бир неча футболчини асрашга қарор қилган. Мураббий учун асосий эътибор олдинда турган муҳим «Ал-Фатеҳ»га қарши чемпионат ўйинига қаратилган.

Шунингдек, у Роналдунинг Саудия Арабистонидан ташқарида ўтадиган учрашувларни ўтказиб юбориши янгилик эмаслигини эслатди. Al Nassr Zone Жезушнинг сўзларини келтирди.

Саудия чемпионатидаги «Ал-Фатеҳ» — «Ан-Наср» учрашуви шанба, 14-февраль куни бўлиб ўтади.