Галатасарайда маошлар кечикмоқда ва клуб ичида таранглик бор
Коньяспор билан учрашувдаги кутилмаган мағлубиятдан сўнг Галатасарай атрофида ёқимсиз хабарлар тарқалди. TR24 портали ёзишича, жамоа футболчилари маошларини ололмаяпти. Бу ҳақда euro-football.ru хабар беради.
Манбага кўра, бу ҳолат кетма-кет уч ой давом этмоқда. Клуб раҳбарияти эса вазият юзасидан расмий изоҳ бермаётгани ОАВ ва мухлислар орасидаги саволларни янада кўпайтирди.
Маҳаллий журналист Халик Юрекли сўнгги воқеаларни инобатга олиб, Галатасарайнинг чемпионлик имкониятлари жиддий шубҳа остида қолаётганини таъкидлади.
Шунга қарамай, жамоа турнир жадвалида 55 очко билан пешқадам. Бироқ 52 очкога эга ва битта ўйини захирада турган Фенербахче Галатасарайни қувиб етиши мумкин.