«Галатасарай» ва «Фенербаҳче» футболчиларига ставкалар учун қамоқ таҳдиди бор

Туркиянинг икки йирик клуби — «Галатасарай» ва «Фенербаҳче» вакиллари спортга тикиш билан боғлиқ иш бўйича қамоқ жазоси олиши мумкин. Бу ҳақда euro-football.ru хабар беради.

Гап «Галатасарай» футболчиси Метехан Балтачи ҳамда «Фенербаҳче» сардори Мерт Ҳакан Яндаш ҳақида кетмоқда. Биринчисига 13 йилгача, иккинчисига эса 17 йилгача озодликдан маҳрум этилиш хавфи бор.

Sabah нашри маълумотига кўра, Балтачи камида икки марта «Галатасарай» ўйинларига ставка қилган. У ўша учрашувларда асосий таркибда бўлмаган, бироқ жамоа қайдномасидан жой олгани сабаб натижага таъсир кўрсатиш имкониятига эга бўлгани таъкидланмоқда.

Амалдаги турк қонунчилигига кўра, футболчи букмекерга ўзининг профессионал спортчи эканини маълум қилиши шарт эди, аммо у буни бажармаган.