Жүздеген көпір нашар күйде: депутат Үкіметке сауал жолдады
Қазақстанда 142 көпір апатты жағдайда тұр, олардың барлығы дерлік жергілікті маңызы бар жолдарда орналасқан. Бұл туралы Құрылтай депутаты Тұрарбек Тілемісов премьер-министрдің орынбасары Қанат Бозымбаевтың атына жолдаған сауалында мәлімдеді, деп хабарлайды Tengrinews.kz тілшісі.
Депутаттың айтуынша, 2026 жылдың басында Қазақстанда 3 623 көпір құрылысы болған. Оның 1 488-і республикалық маңызы бар жолдарда, тағы 2 135-і жергілікті жолдарда орналасқан.
Сонымен қатар 142 апатты көпірдің 141-і жергілікті жол желісіне тиесілі. Тағы 420 көпірдің жағдайы қанағаттанарлықсыз деп бағаланған.
Апатты көпірлер қай өңірде көп?
Тілемісовтің хабарлауынша, апатты көпірлердің ең көп саны екі өңірде шоғырланған:
Қызылорда облысында - 87;
Түркістан облысында - 50.
Ұлытау облысында 24 көпірдің 21-і, ал Батыс Қазақстан облысында 51 көпірдің 44-і қанағаттанарлықсыз күйде.
Жалпы алғанда, жергілікті жолдардағы көпірлердің тек 31,5 пайызы жақсы жағдайда. Ал республикалық жолдарда бұл көрсеткіш 50,5 пайызды құрайды.
"Көптеген ауыл тұрғыны үшін мұндай көпір - аудан орталығымен, мектеппен және ауруханамен байланыстыратын жалғыз жол", - деп атап өтті депутат.
Жергілікті көпірлер жаңғырту бағдарламасынан тыс қалды
Тұрарбек Тілемісовтің сөзінше, Көлік министрлігі 2027–2031 жылдарға арналған көпірлерді түгендеу және жаңғырту бағдарламасын әзірлеп жатыр, алайда ол тек республикалық маңызы бар жолдарды қамтиды. Осылайша, жергілікті жолдардағы 2 135 көпір немесе еліміздегі бүкіл көпір қорының 59 пайызы бағдарламадан тыс қалып отыр.
"Бағдарлама әкімдіктерді міндеттемейді және жергілікті бюджеттерді қаражатпен қамтамасыз етпейді, сондықтан бұл мәселені Үкімет деңгейінде шешу қажет", - деп есептейді депутат.
Осыған байланысты Тілемісов 2027–2031 жылдарға арналған, республикалық және жергілікті жолдарды бірдей қамтитын көпірлерді күтіп ұстау мен қайта жаңартудың бірыңғай бағдарламасын әзірлеуді ұсынды.
Сонымен қатар депутат жергілікті көпірлерді толық түгендеуден өткізуге және 142 апатты нысанның әрқайсысындағы қауіпсіздік шаралары, сондай-ақ жөндеу жұмыстарының басталу мерзімі туралы ақпарат беруге шақырды.
Бұдан бөлек, ол 2023–2026 жылдардағы көпірлерді күтіп ұстауға жұмсалған шығындар мен 2031 жылға дейінгі қажетті қаржыландыру туралы мәліметтерді ұсынуды сұрады.
Еске сала кетейік: жазда Алматы облысында Үлкен Алматы каналының бойындағы тасжолда орналасқан пайдаланылмайтын көпірді су шайып кеткен болатын.