Ԥсуаҵасла аҭацара аныҟәгара: Емма Кәыҵниа-Ашәба лҭоурых
Быжьҩык ахшара ран, амоҭацәеи урҭ ирхылҵызи 25-ҩык ранду Емма Кәыҵниа-Ашәба, ишырҳәо еиԥш, лҭаацәеи лареи Анцәа дреигәырӷьаратәы иҟоуп. Имариамызт 90 шықәса ирзааигәоу Емма Ҭарашь-иԥҳа дызнысхьоу лыԥсҭазааратә мҩа. Уи иацын ауадаҩрақәа, аџьабаа, аџьаус, аха убри аан, лгәы ҭызгоз аԥсуа цәа зыҟәныз лҭаацәаратә гәырӷьара урҭ еимхәыцҵас икәдыршон.