Bakıdan qlobal güclərə SƏRT MESAJ: “Dünya nizamını siyasi ambisiyalar və maraqlar deyil…”

Azərbaycan 2019-cu ildən etibarən 120 dövlətin təmsil olunduğu Qoşulmama Hərəkatına sədrlik edir. Bu müddətin əhəmiyyətli hissəsi COVID-19 pandemiyasının təhlükəsiz dünya nizamını təhdid etdiyi ağır bir dövrə təsadüf edir. Dünya birliyi əyani şəkildə gördü ki, əvvəlki illərdən fərqli olaraq, Azərbaycanın sədrliyi ilə Qoşulmama Hərəkatının fəaliyyətində dinamiklik bərpa edildi, koronavirus kimi qlobal çağırışa qarşı mübarizədə bir çoxlarına örnək ola biləcək qətiyyətli mövqe ortaya qoyuldu.

2020-ci ilin mayında Azərbaycanın təşəbbüsü ilə keçirilən Qoşulmama Hərəkatının liderlər səviyyəsində onlayn sammiti həmin ilin dekabrında BMT Baş Assambleyasının xüsusi sessiyasının keçirilməsi ilə nəticələndi. Həmin dövrdə “peyvənd millətçiliyi”nə qarşı etiraz səsini ucaldan da məhz Azərbaycan Prezidentinin təşəbbüsü ilə Qoşulmama Hərəkatı oldu. Nəticədə bütün ölkələr üçün peyvəndlərə ədalətli və universal çıxışı gündəmə gətirən BMT qətnaməsi qəbul edildi. Həmçinin qlobal çağırışlara münasibətdə uyğun zamanlamanı təmin etmək məqsədilə Hərəkata mütərəqqi institusional yeniliklər gətirildi, təsisatın Parlament Şəbəkəsi və Gənclər Təşkilatı yaradıldı. Növbəti addım isə qadınlar platformasının yaradılması ilə bağlıdır.