Нохчийчоь минех цIанъяр чекхдоккхур ду 2021-чу шарахь

Нохчийчоьнан а, ГIалгIайчоьнан а территореш минех цIанйечу эскархоша чекхбоккхур бу и шайн болх кхо шо даьлча. Цунах лаьцна шотдийнахь дIахьедар дина Къилбан тIеман гонан (ЮВО) инженерин эскаран хьаькамо инарла-майоро Нестеренко Александра, хаам бо ТАСС агенталло.


Инарло дийцарехь, лелхачу хIуманех цIандаза дисина ду Нохчийчохь а, ГIалгIайчохь а тIекхача хала долчу меттигашкахь 6 эзар гектар латта.   


Хьалхо Маршо Радионо хаам бина ма хиллара, латтанаш минех цIандар карара бутт берззалц дахдина Нохчийчохь, маьлхан денош латтарна. Ткъа ГIалгIайчохь хьалхара ло охьадилларца берзийна белхаш.