Կատալոնիայի ինքնավարությունը կարող է ընդլայնվել. Իսպանիայի արտգործնախարար
Իսպանիայի արտգործնախարար Ալֆոնսո Դաստիսը չի բացառել, որ Կատալոնիայում տիրող ճգնաժամը կարող է բերել տարածաշրջանի ինքնավարության կարգավիճակի ընդլայնման: Այս մասին հայտնում է Associated Press գործակալությունը:
«Ես բացառում եմ անկախությունը, սակայն չեմ բացառում մեծ ինքնավարությունը, նույնիսկ եթե այժմ նրանք ամենալայն լիազորություններով և իրավասություններով տարածաշրջաններից մեկն են ոչ միայն Իսպանիայում, այլ նաև ամբողջ աշխարհում», - ասել է Դաստիսը:
Նախարարի խոսքով՝ ժեներալիտետի ղեկավարի պաշտոնից հեռացված Կառլես Պուչդեմոնը «տեսականորեն» կարող է մասնակցել դեկտեմբերին անցկացվելիք տարածաշրջանային ընտրություններին:
«Ես չգիտեմ՝ ինչպիսի դատական գործընթաց տեղի կունենա ներկա պահից մինչև դեկտեմբերի 21-ը: Եթե նա մինչև այդ չբանտարկվի, կարծում եմ՝ նա զրկված չէ ընտրություններին մասնակցելու իրավունքից», - նշել է Դաստիսը:
Հիշեցնենք, որ երեկ Պուչդեմոնը հայտարարել էր, որ մտադիր չէ հեռանալ իր պաշտոնից և կատալոնացիներին կոչ էր արել «ժողովրդավարական դիմադրություն» ցույց տալ Մադրիդին: