ოლაფ შოლცი კიევში ჩავიდა ვოლოდიმირ ზელენსკისთან მოსალაპარაკებლად

გერმანიის კანცლერი ოლაფ შოლცი დღეს კიევში ჩავიდა უკრაინის პრეზიდენტ ვოლოდიმირ ზელენსკისთან მოლაპარაკებებისთვის. ამის შესახებ dpa იტყობინება. როგორც სააგენტო აღნიშნავს, ეს უკრაინაში გერმანიის მთავრობის მეთაურის პირველი ვიზიტია ბოლო ორ-ნახევარი წლის განმავლობაში.

კიევში შოლცის ამჟამინდელი ვიზიტი წინასწარ არ იყო გამოცხადებული.

პარასკევს უკრაინის პრეზიდენტს სატელეფონო საუბარი ჰქონდა გერმანიის კანცლერთან. ზელენსკის თქმით, მათ განიხილეს „გადამწყვეტი ერთობლივი ნაბიჯები, რომლებსაც შეუძლია კიდევ უფრო გააძლიეროს უკრაინის თავდაცვისუნარიანობა“.

კიევში ჩასვლისას შოლცმა დაადასტურა, რომ გერმანია „უკრაინის ყველაზე მტკიცე მხარდამჭერად რჩება ევროპაში“ და აღნიშნა, რომ დეკემბერში ბერლინი უკრაინას 650 მილიონი ევროს ღირებულების იარაღს მიაწვდის, იმოწმებს Der Spiegel-ი გერმანიის კანცლერის სიტყვებს.

გერმანია შეერთებული შტატების შემდეგ უკრაინისთვის იარაღის სიდიდით მეორე მიმწოდებელია. გერმანიის მთავრობის ინფორმაციით, ფართომასშტაბიანი ომის დაწყებიდან გერმანიამ უკრაინას თითქმის 28 მილიარდი ევროს ღირებულების იარაღი და ტექნიკა გადასცა.

ექსპერტები თვლიან, რომ ზელენსკი შოლცთან შეხვედრაზე უდავოდ დააყენებს უკრაინის ნატოში გაწევრიანების საკითხს.

ახლახან ბრიტანულ ტელეარხ Sky News-თან ინტერვიუში უკრაინის პრეზიდენტმა აღიარა, რომ ქვეყანას შეუძლია დათანხმდეს რუსეთთან ცეცხლის შეწყვეტას უკრაინის ყველა ტერიტორიის განთავისუფლების გარეშეც, თუ უკრაინის ტერიტორია, რომელსაც ახლა აკონტროლებს კიევი, „ნატოს ქოლგაში მოექცევა“. ზელენსკის თქმით, ნატოში უკრაინის მიწვევამ, რომელშიც ნათქვამი იქნება, რომ ნატო აღიარებს უკრაინის კანონიერად არსებულ საზღვრებს, შეიძლება დაასრულოს ომის „ცხელი ფაზა“.

მაგრამ გერმანია რჩება ჩრდილო-ატლანტიკურ ალიანსში უკრაინის სწრაფად მიწვევის საკვანძო ევროპელ ოპონენტად. „ჩვენ ვზრუნავთ, რომ ნატო არ გახდეს ომის მხარე, რათა ეს ომი არ გადაიზარდოს უფრო დიდ კატასტროფაში“, - განაცხადა შოლცმა ოქტომბერში აშშ-ის პრეზიდენტის ბერლინში ვიზიტის დროს.

რუსეთის პრეზიდენტმა ვლადიმირ პუტინმა სამშვიდობო მოლაპარაკებების დაწყების პირობად დაასახელა უკრაინის უარი ყირიმსა და რუსეთის მიერ დაკავებულ ოთხ რეგიონზე და ნატოში გაწევრიანებაზე.

15 ნოემბერს ოლაფ შოლცმა ორი წლის განმავლობაში პირველად გამართა სატელეფონო საუბარი რუსეთის პრეზიდენტთან. გერმანიის მთავრობამ განაცხადა, რომ შოლცმა მოუწოდა პუტინს, უკრაინასთან მოლაპარაკება აწარმოოს სამართლიანი და მყარი მშვიდობის დასამყარებლად და ხაზი გაუსვა გერმანიის ურყევ გადაწყვეტილებას, მხარი დაუჭიროს უკრაინას რუსეთის აგრესიის წინააღმდეგ ბრძოლაში მანამ, სანამ ეს საჭიროა.

უკრაინის პრეზიდენტმა ვოლოდიმირ ზელენსკიმ მკვეთრად დაგმო შოლცის საუბარი პუტინთან და აღნიშნა, რომ ის „ხსნის პანდორას ყუთს“.