Тәуелсіздіктің символы - ақордалы Астана

АСТАНА. ҚазАқпарат - «Осындай істі бастау менің маңдайыма бұйырды әрі мен осы істі бастадым! Қалың елім сеніп, соңымнан ерді. Мемлекет құруда да, Астана салуда да солай болды. Осыдан артық бақыт бар ма?». Мемлекет басшысы бүгінгі айбарлы да әсем Астанамыздың тікелей авторы - Нұрсұлтан Назарбаев бір естелігінде осылай деп толғанған еді. Шындығында, егемен ел, Тәуелсіз мемлекет атану да, сосын ешкімге жалтақтамастан ұлы істі қолға алып, өзінің дербес астанасын өзі таңдап, өз қолымен салу да зор бақыт. Ал осындай екі ұлы істе ең алдымен Елбасының ерлігі ерен. Өйткені, жұртшылық айтып жүргендей Тәуелсіздіктің ең зор тұлғасы Президент болса, Астана - Президенттің, Тәуелсіздіктің төл перзенті.