Теңіз кенішінде мұнай өндіру қалпына келтірілді

Қазақстан энергетика министрлігі 31 қаңтарда Теңіз кенішінде мұнай өндіру қалпына келтірілгенін хабарлады. Алғашқы ұңғыма бүгін сағат 3:35-те іске қосылған.

"Қазіргі кезде 5 ұңғыма пайдалануға берілді. «Теңізшевройл» компаниясының техникалық қызметтері келесі топтық өлшеу қондырғысын іске қосуға дайындық жұмыстарын жүргізіп жатыр. Мұнай өндіру көлемін арттыру жүйе параметрлері тұрақтандырылып, өндірістік процестердің толық қауіпсіздігі қамтамасыз етілуіне қарай кезең-кезеңімен жүзеге асырылады" деп жазылған министрліктің хабарламасында.

Ведомствоның хабарлауынша, екінші буындағы зауыт 26 қаңтарда іске қосылған. Оны Королев кеніші шикізатпен қамтамасыз еткен.

18 қарашада Теңіз кенішінде турбина трансформаторы өртеніп, кеніште мұнай өндіру тоқтатылған еді. Бұған дейін "Теңізшевройл" компаниясы кеніштегі өрттен кейін CPC Blend мұнай түрін тасымалдауға қатысты форс-мажор жариялаған.

26 қаңтарда "Теңізшевройл" мұнай өндіруді қалпына келтіріп жатқанын, бірақ бұл процесс кезең-кезеңімен жүзеге асырылатынын айтқан.

Теңіз кеніші Атыраудан 340 шақырым жерде. Оны игеретін "Теңізшевройл" Қазақстанда 1993 жылдан бері жұмыс істейді. "Теңізшевройл" мұнай өңдеу концерніне Chevron (50 % акция), ExxonMobil Kazakhstan Ventures Inc (25%), қазақстандық "ҚазМұнайГаз" (20%) және LUKArco (5%) компаниялары кіреді.

Қазақстанда өндірілетін мұнайдың үштен бірі Теңізден шығады.