Қырғызстанда 17 жастағы қыздың өліміне күдікті ер адам абақтыдан өлі табылған

17 жастағы мектеп оқушысы Айсулуу Мукашеваны өлтірді деген күдікпен қамауға алынған 41 жастағы ер адам Бішкектегі тергеу изоляторында қаза болған. Бұл ақпаратты Қырғызстан үкіметі жанындағы Жаза орындау қызметі растады.

Мекеме таратқан ақпаратта 2026 жылғы 7 ақпанда сағат 12:30 шамасында Бішкектегі №21 тергеу изоляторының камерасында айыпталушы А.К.К. асылып тұрған қалпы табылғаны айтылған. "Мекеме қызметкерлері алғашқы медициналық көмек көрсеткенімен, ол оқиға орнында қайтыс болды" деп хабарлады Жаза орындау қызметі.

Абдыров тергеу абақтысында былтыр 17 желтоқсанда Бішкек қалалық ішкі істер басқармасының уақытша ұстау изоляторынан ауыстырылған.

Айсулуу Мукашева 2025 жылғы 27 қыркүйекте Ыстықкөл облысында хабар-ошарсыз кеткен еді. Ол Қарақол қаласындағы құрбысына баруға жолға шыққан. Қырғызстан ішкі істер министрлігінің мәліметінше, 41 жастағы күдікті Honda Stream көлігімен оны жолдан алып кеткен. Тергеу болжамы бойынша, кейін ол қызды зорлап, өлтіріп, Шу облысындағы Боом шатқалына тастап кеткен.

Құқық қорғау органдары күдіктінің осыған ұқсас тағы бірнеше қылмысқа да қатысы бар болуы мүмкін деп топшылайды. Атап айтқанда, 2014 жылғы 16 наурызда Бішкек маңындағы Байтик ауылында өлі табылған Камила Дүйшөбаеваның өліміне осы күдіктінің қатысы бар деген болжам айтылған.