Куба президенті АҚШ-пен келіссөз жүргізгенін хабарлады
Куба президенті Мигель Диас-Канел АҚШ-пен келіссөз жүргізгенін хабарлады. Келіссөз екі ел арасындағы келіспеушіліктерді шешуге бағытталған деді Диас-Канел баспасөз мәслихатында.
Куба президентінің сөзінше, кейінгі үш айда Вашингтонның энергетикалық тосқауылына байланысты елге ешқандай мұнай тасымалданбаған.
Бұған дейін АҚШ президенті Дональд Трамп аралды "достық ниетпен басып алу" мүмкіндігі туралы айтқан. Ол сонымен бірге Куба үкіметінің "жақын арада" құлайтынын да жоққа шығармаған.
Куба президентінің мәлімдемесіне дейін бірнеше сағат бұрын Куба сыртқы істер министрлігі Ватиканның араағайындық етуімен 51 тұтқын босатылатынын айтты. Бұл жөнінде The Wall Street Journal (WSJ) жазды. BBC саяси тұтқындар босатыла бастағанын хабарлады.
WSJ дерегінше, Трамп әкімшілігі 2026 жылдың соңына дейін Куба билігін ауыстыру үшін Куба үкіметінен агенттер іздеген. Axios-тың жазуынша, АҚШ мемлекеттік хатшысы Марко Рубио Кубаның бұрынғы президентінің немересі Рауль Кастромен келіссөз жүргізген.
Трамп Кубаның АҚШ-пен келісім жасасуға бейіл екенін растады.
Қаңтар соңында АҚШ президенті Кубаға тіке немесе жанама түрде мұнай тасымалдайтын елдерден келетін импортқа бас салығын енгізуге мүмкіндік беретін жарлыққа қол қойған. Ақ үй өкілдері сол кезде "Куба режимі көптеген қастық ниеттегі елдермен байланыс жасайды, өз елінде олардың әскери және барлау құрылғыларын орналастырып жатыр" деп айтқан. Америка жағы мысал ретінде Кубада Ресейдің шетелдегі ең ірі радиоэлектронды барлау орталығы орналасқанын, оның "құпия ақпаратты ұрлаумен айналысатынын" және бұл АҚШ-тың ұлттық қауіпсіздігіне қатер төндіретін айтқан.