Алматы облысында жоғалып кеткен оқушылар мен мұғалімдер аман табылды

Алматы облысының Қарасай ауданында құтқарушылар тоғыз адамнан тұратын топты іздестірді. Екі мұғалім бастаған жеті оқушы Известковое шатқалында адасып кеткен, - деп хабарлайды Tengrinews.kz Төтенше жағдайлар министрлігінің ресми Telegram-арнасына сілтеме жасап.

Іздестіру-құтқару операциясына Алматы облыстық ТЖД, ТЖМ "Барыс" республикалық құтқару қызметінің мамандары, полиция және жедел жәрдем қызметкерлері, сондай-ақ, еріктілер қатысты. Жергілікті жерді тексеру үшін тепловизоры бар дрондар мен тікұшақ қолданылды.

"Таңертең топ табылды. Құтқарушылар адасқандарға жетіп, оларды автотұраққа дейін аман-есен алып келді", - деп хабарлады ТЖМ.

Оқушылар ата-аналарына тапсырылды. Оларға медициналық көмек қажет болмады.