Павлодарда туберкулезге күдік тудырған оқушымен байланыста болғандар тексеріліп жатыр

Павлодардағы гимназиялардың бірінде 15 жастағы оқушы қыз өкпе туберкулезі күдігімен ауруханаға жатқызылды. Мектепте және қыздың үйінде дезинфекция жүргізілді, санитарлық дәрігерлер науқаспен байланыста болғандарды анықтап жатыр, деп хабарлайды TengriHealth.
Кәмелетке толмаған жасөспірімнен қауіпті инфекцияның анықталғаны туралы ақпаратты қалалық санитарлық-эпидемиологиялық бақылау басқармасы растады. Санитарлық дәрігерлерге баладан туберкулез күдігі туралы шұғыл хабарлама медицина мамандарынан түскен.

"Павлодар қаласындағы гимназиялардың бірінде 2011 жылы туған оқушыдан туберкулез оқиғасы тіркелді. Қазіргі уақытта баланы тексеруден өткізу үшін оның тұрғылықты жері мен оқу орны бойынша байланыста болған адамдар шеңбері анықталып жатыр. Мектепте және үй ошағында туберкулез қоздырғыштарына қарсы тиімді дезинфекциялық құралдарды қолдана отырып, қорытынды дезинфекция жүргізілді", - деп түсіндірді Павлодар қалалық санитарлық-эпидемиологиялық бақылау басқармасының басшысы Гүлия Әлменова.

Ведомство мектеп-гимназияда туберкулез оқиғасының анықталуына байланысты карантиндік шараларды енгізудің қажеті жоқ екенін, бірақ жағдай бақылауда екенін айтты.
Эпидемиологиялық зерттеу 30 күнге созылады. Қазір оқушы қыз ауруханада жатыр.

"Кәмелетке толмаған бала Павлодар облыстық фтизиопульмонология орталығына жатқызылды, онда оған қажетті медициналық көмек көрсетіліп жатыр. Оның жағдайы қанағаттанарлық деп бағаланып отыр", – деп хабарлады Павлодар облысының білім басқармасы.

Ауырған қызбен бірге оқитын сыныптастарынан Манту сынамасы алынды, сондай-ақ мектеп кабинеттері мен ортақ пайдаланылатын орындарда дезинфекция жүргізілді.
"Алдыңғы тексеруден кейін белгіленген мерзімі өткен қызметкерлерді флюорографиялық тексеруден өткізу қарастырылған", - деп атап өтті ведомство өкілдері. Сонымен қатар дезинфекциялық құралдарды қолдана отырып ылғалды тазалау және бөлмелерді желдету сияқты жоспарлы профилактикалық іс-шаралар жалғасып жатқанын қосып өтті.
Қарағанды университетінде туберкулездің үш жағдайы анықталды: тергеу жүріп жатыр
Еске сала кетейік, осы жылдың қыркүйек айында академик Бөкетов атындағы Қарағанды зерттеу университетінің үш студентінен туберкулез табылған болатын. Жастардың университет жатақханасында емес, әртүрлі мекенжайда тұрғаны хабарланды. Тұрғылықты жері мен университетте дезинфекция жүргізілді. Бірақ оқу орнында карантин енгізілген жоқ.