ټرمپ او شرع د کردانو د حقونو په خوندیتوب خبرې کړي
د سوریې د ولسمشرۍ ماڼۍ اعلان کړی چې د دغه هېواد ولسمشر احمد شرع او د امریکا د متحدو ایالتونو ولسمشر ډونالډ ټرمپ د دوشنبې په ورځ د جدی په ۲۹مه د ټيلفون له لارې د کردانو د حقونو د خوندیتوب په اړه خبرې وکړې.
د فرانس پرېس خبري اژانس د راپور له مخې، دا ټلیفوني تماس وروسته له هغې شوی چې دمشق له کرد ځواکونو سره یوې هوکړې ته ورسېد چې اوربند هم پکې شامل دی.
احمد شرع د کردانو په مشرۍ د سوریې د دموکراتیکو ځواکونو له مشر مظلوم عبدي سره په کتنه کې هم د دې هوکړې په اړه خبرې وکړي.
دغه هوکړه د سوریې د حکومتي جوړښت په چوکاټ کې د کردانو د ادارې د مدغم کېدو موضوع رانغاړي، خو یوې کرد سرچینې چې د خبرو اترو له جزییاتو خبره ده، فرانسپرېس ته ویلي چې د مذاکراتو فضا مثبته نه وه.
دې کرد سرچینې، چې نه یې غوښتل نوم یې واخیستل شي، د دوشنبې د ورځې د شرع او عبدي ترمنځ د خبرو په اړه وویل چې اختلافات د «هوکړې د موادو د پلي کېدو د میکانیزم» پر سر دي.
د سوریې ولسمشرۍ ماڼۍ ویلي چې د احمد شرع او ډونالډ ټرمپ په ټلیفوني تماس کې «د سوریې د دولت په چوکاټ کې د کردانو د خلکو د حقونو د تضمین او ساتنې پر اړتیا» ټینګار شوی دی.
دواړو لورو همدارنګه «د سوریې د خاورې د یووالي او خپلواکۍ د ساتلو پر اهمیت» ټینګار کړی او د داعش ډلې پر ضد د «همکارۍ» په اړه یې خبرې کړې دي.
د اوربند له اعلان سره سره د دوشنبې په ماښام د رقه په ښار کې د لنډې مودې لپاره نښتې وشوې او د فرانسپرېس خبریال ویلي چې د سختو بمباریو غږونه یې اورېدلي دي.
وروسته د سوریې د دفاع وزارت یوې سرچینې فرانسپرېس ته پرته له دې چې نور جزییات ورکړي ویلي چې نښتې درېدلې دي.
د کردانو او د سوریې د حکومتي ځواکونو ترمنځ نښتو امنیتي اندېښنې زیاتې کړې او هغه د دې سبب شوې چې ملکي وګړي له خپلو سیمو بې ځایه شي.