Түбән Кама шәһәренең киләчәге турында күчмә утырыш булды

Түбән Кама шәһәрен төзекләндерү буенча төп максатларны билгеләү өчен, Түбән Кама Башкарма комитеты җитәкчесе урынбасары Айназ Ярмиев архитектор Равил Сафиуллин белән очрашты. «Уңайлы шәһәр мохите» федераль программасы кысаларында, Бакый Урманче урамы белән Төзүчеләр проспекты арасындагы территорияне төзекләндерү планлаштырыла. Түбән Кама шәһәре генераль план буенча җәяүлеләр шәһәре булырга тиеш.

«Төрле буын кешеләрен исәпкә алып, актив ял итү зоналары булдырырга кирәк», - диде Айназ Ярмиев. Бу турыда Түбән Кама муниципаль районы рәсми сайтында хәбәр ителә.

Алга таба төзекләндерү программасын тормышка ашыру өчен, тәкъдимнәр дә файдаланылачак. Программада җәяүлеләр зонасы һәм юллар киселеше билгеләнеләчәк.

«Бу территориядә тыныч ял итү зонасы оештырсаң, яхшы булыр иде. Әлеге урынны төзекләндерү өчен менә дигән мөмкинлек бу. Халык белән сөйләшеп, уртак фикергә килергә кирәк. Администрациянең һәм төзүчеләрнең дә үз чикләүләре бар, аны да исәпкә алмыйча булмый. Шулай ук якларның да үзара сөйләшеп, карар кабул итүләре бик мөһим», - диде Равил Сафиуллин.

Шунысын да билгеләп үтәргә кирәк, Равил Сафиуллин халык белән аралашу өчен, Телеграм-канал булдырды, ул аны үзе алып бара. «Һәр сорауга җавап бирергә тырышам. Кешеләр белергә тиеш дип саныйм: аларны ишетәләр, җавап бирәләр. Мин бу әйбергә вакытны сарыф итәргә әзер һәм фикерләрне игътибар белән карыйм, җавап бирәм», - диде Равил Сафиуллин.

Киләсе елда, программага кергән очракта, бу урында төзекләндерү эшләрен башлау планлаштырыла. Тагын шәһәрдә 8 җәяүлеләр йөри торган зона булырга тиеш, алар үз чиратларын көтә.