Путин Кара диңгез яр буендагы экологик фаҗигане «зур бәла» дип атады

Ике танкер һәлакәткә очрап, ярга нефть продуктлары акканнан соң, Анапада һәм аның тирә-ягында чын экологик фаҗига килеп чыкты. Краснодар крае халкы булган хәлнең нәтиҗәләрен бетерүне тизләтү үтенече белән Россия Президенты Владимир Путинга туры элемтәдә мөрәҗәгать итте.

Путин Кара диңгезгә аккан ягулыкны бетерү буенча барысын да эшләргә өндәде. «Шторм кичә генә 4-5 балл белән дәвам итте һәм эшләргә шактый авыр. Шимбәгә диңгез тынычланырга тиеш һәм эшне җайга салып булачак», – диде ул.

Шулай ук Путин белдергәнчә, Кара диңгездә һәлакәткә очраган танкерлардан ягулыкның 40 проценты агып чыккан. «Төрле хезмәтләр, төрле ведомстволар хезмәтләре эшли — Табигать ресурслары министрлыгы, Транспорт министрлыгы, Гадәттән тыш хәлләр министрлыгы, бу эш координацияләнергә тиеш. Бу урынны әйләндереп алу һәм яр буенда барлыкка килгән ягулыкны җыеп алу өчен барысын да эшләргә кирәк», – дип йөкләде Владимир Путин.

Керчь бугазында танкерлар һәлакәтеннән соң Краснодар крае ярлары мазут белән капланды. Коткаручылар бу нәтиҗәләрне экстрен рәвештә юкка чыгарырга тырыша. Әмма күпчелек хайваннар һәм кошлар зыян күргән инде. Экологлар кешеләр һәм диңгез тереклеге өчен җитди нәтиҗәләр турында кисәтә.

«Нефть продуктлары Темрюк районындагы Веселовка бистәсеннән алып Анападагы Благовещенская станицасына кадәр берничә дистә километр ярга чыкты», – дип хәбәр итте элегрәк Краснодар крае губернаторы Вениамин Кондратьев.