Болгар ислам академиясенең халыкара эшчәнлектәге казанышлары белән таныштырдылар
Бүген «Татар-информ» мәгълүмат агентлыгында «Болгар ислам академиясенең фәнни-мәгариф һәм халыкара эшчәнлеге: казанышлар һәм перспективалар» темасына матбугат конференциясе булды. Тулырак бу хактагы сорауларга Болгар ислам академиясе ректоры Фәрхәт Хөснетдинов җавап бирде.
«Әлеге көндә академиядә 120 студент-шәкерт белем ала. Магистратурада 66, докторантурада 34 һәм теологиядә 20 кеше укый. Ислам академиясе барлыкка килгәннән бирле барлыгы 116 магистр, 25 ислам фәннәре докторы һәм 30 теология магистры укып чыккан. Шәкертләребезнең географиясенә күз салсак, елдан-ел чит төбәкләрдән һәм башка илләрдән килүчеләр саны артуын күзәтәбез. Узган ел 23 төбәктән килделәр, әлбәттә иң күбе – Идел буе төбәкләре һәм Бәйсез Дәүләтләр Берлеге илләре гражданнары. Казахстан, Үзбәкстан, Таҗикстан һәм Төркмәнстаннан килгән дин кардәшләребез шактый. Безгә укырга керүчеләр – мәктәп тәмамлаучылар түгел, ә имамнар», – дип белдерде ул.
Ректор билгеләвенчә, укып чыгучыларны эшкә урнаштыру мәсьәләләрендә кыенлыклар юк. Биредә югары дини белемгә ия булучылар – төрле дәрәҗәле дини оешмаларда хезмәт куючылар.
«Әлеге вакытта Болгар ислам академиясенең бик күп дини оешмалар белән килешүе бар. Аларның 24е – халыкара дәрәҗәдәгеләр. Былтыр да безнең өчен зур вакыйга булды: Казан кирмәнендә Россиянең Фән һәм югары белем министры Валерий Фальков һәм Татарстан Рәисе Рөстәм Миңнеханов катнашында Мисырдагы 1200 еллык тарихы булган институт белән меморандум төзелде. Аннары академиябездә 6 гарәп коллегабыз даими нигездә яши һәм эшли. Алар исә Сирия, Мисыр һәм Индия кебек илләрдән. Ә магистратура һәм аспирантурада укучыларыбыз күптән түгел Каһирәдә, квалификация күтәрү стажировкасында булып кайттылар», – дип аңлатты ул халыкара күләмдәге эш турында.
Шулай матбугат очрашуы барышында Россия Федерациясе Президенты Владимир Путинның туры элемтә конференциясе вакытында Татарстандагы динара һәм конфессияара мөнәсәбәтләрне уңай бәяләве искәртелде. Бу җәһәттән Болгар академиясе үрнәк итеп китерелгән.